Narkojinoyatlarga qarshi kurashgan fuqarolar ko‘krak nishoni bilan taqdirlanadi
Endi “Narkotiklarga qarshi kurashish fidoyisi” nishoni har yili 26 iyun kuni tantanali topshiriladi.
Prezident maʼmuriyati huzuridagi Narkotiklar va o‘qotar qurollarni nazorat qilish agentligiga tavsiya etilgan nomzodlar ro‘yxati asosida har yili eng faol fuqarolar “Narkotiklarga qarshi kurashish fidoyisi” ko‘krak nishoni bilan mukofotlanadi. Adliya vazirligi xabariga ko‘ra, nishonni bir shaxs faqat bir marta olishi mumkin va u davlat mukofotlaridan so‘ng, ko‘krakning chap tomoniga taqiladi.
Yangi nizomga muvofiq, nomzodlar ro‘yxati har yili 1 mayga qadar taqdim etiladi; taqdirlash esa Xalqaro giyohvandlikka qarshi kurashish kuni, 26 iyun arafasida tantanali ravishda o‘tkaziladi. Bu tashabbus jamiyatda profilaktika faoliyatini rag‘batlantirish, giyohvandlikka qarshi fuqarolik faolligini qo‘llab-quvvatlashga xizmat qiladi.
Shu bilan birga, farmon doirasida narkojinoyatlarga qarshi jazolar kuchaytirildi: transchegaraviy tarqatish, internet orqali sotish yoki narkoguruh tashkil etish kabi og‘ir jinoyatlar uchun 20 yilgacha ozodlikdan mahrum etish nazarda tutilmoqda. Voyaga yetmaganlarni jalb etganlarga qarshi jazolar og‘irlashtiriladi, jamoat joylarida moddalarni isteʼmol qilganlik uchun esa 15 kungacha maʼmuriy qamoq joriy etilishi mumkin. Raqamli texnologiyalar vazirligi va IIV 2026-yil 1-iyulgacha internetda noqonuniy savdoni aniqlovchi sunʼiy intellekt tizimini joriy etishni rejalashtirmoqda.
