O‘zbekistonda shartli ravishda ozod etilgan fuqarolarga nazorat kuchaytiriladi
Endilikda ular probatsiya organlariga muntazam hisobot beradi.
O‘zbekiston Oliy Majlisining navbatdagi majlisida shartli ravishda muddatidan oldin ozod etilgan shaxslar ustidan nazoratni kuchaytirishga qaratilgan qonun loyihasi birinchi o‘qishda ma’qullandi.
Qonun loyihasiga ko‘ra, probatsiya nazoratida bo‘lgan fuqarolar endilikda belgilangan tartibda nazorat organlariga muntazam ravishda hisobot berib borishlari shart bo‘ladi. Agar ular belgilangan talablarga amal qilmasa yoki qoidabuzarlikka yo‘l qo‘ysa, sud qarori bilan jazoni o‘tashga qayta yo‘naltirilishi mumkin bo‘ladi.
Mazkur tashabbus Jinoyat-ijroiya kodeksiga yangi 28¹-bobni kiritishni nazarda tutadi. Unda probatsion nazoratning huquqiy asoslari, qo‘shimcha majburiyatlar, ularni bekor qilish tartibi hamda nazorat talablarini buzish oqibatlari belgilab qo‘yilgan.
Deputatlar ta’kidlashicha, qonun loyihasining qabul qilinishi probatsiya tizimini mustahkamlash, qonunga hurmatni kuchaytirish, jamoat xavfsizligini ta’minlash va takroriy jinoyatlarning oldini olishga xizmat qiladi.
