Toshkent aeroportida 20 soniyada yakunlanadigan avtomatlashtirilgan pasport nazorati ishga tushdi
Yangi E-Gate tizimi O‘zbekiston fuqarolari uchun mo‘ljallangan bo‘lib, chegara nazoratini tezlashtirish va qulaylikni oshirishga xizmat qiladi.
Toshkent xalqaro aeroportining uchib kelish zalida avtomatlashtirilgan E-Gate pasport nazorati tizimi ishga tushirildi. Uzbekistan Airports ma’lumotiga ko‘ra, endilikda yo‘lovchilar biometrik pasportini skanerga qo‘yib, Face ID orqali shaxsi tasdiqlangach, atigi 20 soniyada nazoratdan o‘tadi.
Yangi tizim sakkizta elektron yo‘lak bilan jihozlangan bo‘lib, u faqat O‘zbekiston fuqarolari uchun mo‘ljallangan. Shaxs aniqlangach, turniket avtomatik tarzda ochiladi, bu esa nazorat jarayonini bir necha baravar tezlashtiradi. 2023-yilda jo‘nash zalida sinov tariqasida ishga tushirilgan E-Gate tizimi endi uchib kelish yo‘nalishida ham joriy etildi — natijada aeroportdagi avtomatlashtirilgan yo‘laklar soni 20 taga yetdi.
E-Gate texnologiyasi yo‘lovchilarga tezlik va qulaylik yaratish bilan birga, inson omilini kamaytirib, xavfsizlikni oshiradi. Hozirda Toshkent xalqaro aeroporti yiliga 11 million yo‘lovchiga xizmat ko‘rsatmoqda. Mutasaddilar fikricha, bu tizim raqamlashtirish jarayonini jadallashtirib, O‘zbekiston aeroportlarini xalqaro standartlarga yaqinlashtirishda muhim qadam bo‘ladi.
