AQSH tarixidagi eng uzoq shatdaun rasman yakunlandi
AQSH prezidenti Donald Tramp federal hukumat faoliyatini moliyalashtirishni 30-yanvargacha uzaytiruvchi qonunni imzoladi.
AQSh prezidenti Donald Tramp mamlakat federal hukumatining ish faoliyatini 30-yanvargacha moliyalashtirishni uzaytiruvchi qonunni imzoladi. Shu tariqa, AQSH tarixidagi eng uzoq davom etgan shatdaun rasman yakunlandi.
Mazkur shatdaun 43 kun davom etdi va bu mamlakat tarixida hukumat faoliyati to‘xtatilgan eng uzun muddat sifatida qayd etildi. Federal byudjet bo‘yicha respublikachilar va demokratlar o‘rtasidagi kelishmovchiliklar natijasida 750 mingga yaqin federal xizmatchi ish haqi saqlanmagan holda majburiy ta’tilga chiqarilgan edi. Faqat aviatsiya dispetcherlari, politsiya, chegara qo‘riqlash xizmati va shoshilinch tibbiy yordam tizimi ishini davom ettirdi.
“Shatdaun” atamasi AQSHda davlat tomonidan moliyalashtirish to‘xtatilishi oqibatida hukumat idoralarining vaqtincha yopilishi holatini anglatadi. Bunday vaziyatda zarur xizmatlarni bajarayotgan mansabdorlar maoshsiz ishlashga, qolganlari esa to‘lovsiz ta’tilga chiqishga majbur bo‘ladi.
Ushbu shatdaun natijasida AQSHning NATO ittifoqchilariga 5 milliard dollardan ortiq qurol yetkazib berish jarayoni kechiktirildi. Donald Tramp mamlakatning iqtisodiy yo‘qotishlarini 1,5 trillion dollar deb baholab, bunga demokratlarni aybladi.
“Demokratlar shatdaunga qaratilgan so‘nggi harakatlari bilan mamlakatimizga 1,5 trillion dollar zarar yetkazdi”, — deb yozdi Tramp Truth Social tarmog‘ida.
Shatdaun tugagach, federal xizmatchilar ish joylariga qaytariladi va ularga to‘lanmay qolgan ish haqlari to‘liq qoplab beriladi.
AQSHda ushbu holat 2025-yil 1-oktyabrda, navbatdagi moliya yili uchun byudjet loyihasi bo‘yicha kelishuvga erishilmagani sababli yuzaga kelgan edi. Mojaroning asosiy sababi — Tramp ma’muriyati va Demokratik partiya o‘rtasida Obamacare deb nomlanuvchi tibbiy sug‘urta dasturini moliyalashtirish masalasidagi kelishmovchilik bo‘ldi.
Shatdaun davrida Moliya, Sog‘liqni saqlash va Ta’lim vazirliklarini o‘z ichiga olgan 7 ta federal idorada 4 mingdan ortiq xizmatchi ishdan bo‘shatildi. Bu 2019-yildan beri AQSHda qayd etilgan ilk yirik moliyaviy inqirozli tanaffus bo‘ldi.
