O‘zbekistonda 14–18 yoshli o‘smirlarga bank kartasini mustaqil ochish huquqi berildi

 

O‘zbekiston Markaziy banki tomonidan bank kartalariga oid qoidalarga o‘zgartish va qo‘shimchalar kiritildi. Yangilangan tartibga ko‘ra, endilikda 14 yoshdan 18 yoshgacha bo‘lgan fuqarolar o‘z nomlariga bank kartasini mustaqil ravishda ochish huquqiga ega bo‘ldilar.

 

Mazkur hujjat 2025-yil 11-noyabr kuni davlat ro‘yxatidan o‘tkazilgan bo‘lib, u aholining moliyaviy xizmatlardan foydalanish imkoniyatlarini kengaytirish va raqamli bank tizimini rivojlantirishga qaratilgan.

 

Yangi tartibga muvofiq:

• 14–18 yoshli o‘smirlar endilikda bank kartasini mustaqil ochishi mumkin;
• 14 yoshgacha bo‘lganlar uchun esa ota-onaning biri yoki qonuniy vakilining yozma roziligi talab etiladi;
• Yakka tartibdagi tadbirkorlar va o‘zini o‘zi band qilgan shaxslar biznes bank kartalari orqali o‘z hisobvaraqlaridagi mablag‘larini boshqarish huquqiga ega bo‘ladi;
• Yuridik shaxslar ichimlik va oqova suv xizmatlari uchun to‘lovlarni korporativ bank kartalari orqali amalga oshirishi mumkin.

 

Shuningdek, bank kartalari turlari safiga ijtimoiy bank kartasi ham kiritildi. Endilikda oldindan emissiya qilingan shaxsiy bank kartalarini chiqarish hamda mobil ilovalar orqali foydalanuvchini identifikatsiya qilgan holda kartani faollashtirish tartibi belgilab qo‘yildi.

 

Mazkur yangiliklar O‘zbekistonda moliyaviy tizimni yanada qulay, xavfsiz va inklyuziv qilishga xizmat qiladi.