O‘zbekistonda metan narxi 30 foizdan ortiqqa oshdi

 

Markaziy bank ma’lumotlariga ko‘ra, 2025-yil oktabr oyida O‘zbekistonda metan narxi yillik hisobda 30,5 foizga oshgan. Shuningdek, benzin (11,7 foiz), nikoh uzugi (33,4 foiz), gazeta va jurnallar (15,3 foiz), sigaret (9,6 foiz) hamda tabiiy gullar (9,8 foiz) narxlarida ham o‘sish kuzatilgan.

 

Bunga qaramay, bir qator tovarlar narxi pasaygan. Xususan, propan 18 foizga, konditsionerlar 1,3 foizga, televizorlar 0,3 foizga, qog‘oz esa 3,9 foizga arzonlashgan.

 

Iste’mol narxlari indeksiga kiruvchi 250 turdagi nooziq-ovqat mahsulotlarining 97 foizida yillik narx o‘sishi 10 foizdan oshmagan.

 

Oziq-ovqat mahsulotlari ichida suyaksiz mol go‘shti (25,3 foiz), karam (24,7 foiz) va kungaboqar moyi (22,6 foiz) sezilarli qimmatlashgan. Aksincha, shaftoli (−28,7 foiz), tarvuz (−21,8 foiz), guruch (−18 foiz), bodring (−17,6 foiz) va banan (−15,1 foiz) narxi pasaygan.

 

Xizmatlar sohasida esa narxlar turlicha o‘zgargan:

• ichki aviareyslar — +52,3 foiz;
• tarmoq gazi — +39,2 foiz;
• sovuq suv — +35,1 foiz;
• muzey xizmatlari — +32,3 foiz;
• chiqindi tashlash — +28,6 foiz;
• shahar avtobuslari yo‘l haqi — +22,3 foiz

 

Shu bilan birga, pul o‘tkazmalari (−4,8 foiz) va mikromoliyaviy xizmatlar (−0,2 foiz) biroz arzonlashgan.

 

Markaziy bank qayd etishicha, O‘zbekistonda yillik inflyatsiya 7,8 foizni tashkil etib, o‘tgan yilga nisbatan 2,4 foiz punktga pasaygan.