O‘zbekistonda sud ishtirokchilarini chetlashtirish mexanizmi joriy etilishi mumkin
Sud jarayonlarida prokuror, advokat va ekspertlarning manfaatlar to‘qnashuvi holatlarida ishda qatnashishini cheklovchi yangi tizim joriy etilishi rejalashtirilmoqda.
O‘zbekiston Respublikasi Oliy Majlisi Qonunchilik palatasi tomonidan ma’muriy ish yuritish kodeksiga o‘zgartishlar kiritishni nazarda tutuvchi qonun loyihasi umumxalq muhokamasiga taqdim etildi. Hujjatda sudya, prokuror, advokat, ekspert, tarjimon va boshqa ishtirokchilarni manfaatlar to‘qnashuvi yuzaga kelgan hollarda sud jarayonidan chetlashtirish tartibini belgilovchi yangi bo‘limni joriy etish taklif etilmoqda.
Mazkur tashabbusning asosiy maqsadi — adolatli sudlovni ta’minlash, xolislik tamoyillarini mustahkamlash hamda sud tizimiga bo‘lgan jamoatchilik ishonchini oshirishdan iborat.
Loyihaga ko‘ra, agar sudya, prokuror yoki boshqa ishtirokchi ilgari ayni ishda jabrlanuvchi, guvoh, advokat yoki ekspert sifatida qatnashgan bo‘lsa, tomonlardan biri bilan qarindoshlik rishtalari mavjud bo‘lsa yoki ularning xolisligiga shubha uyg‘otuvchi holatlar aniqlansa, ular ishni ko‘rishdan chetlashtiriladi.
Shuningdek, advokat yoki ekspert manfaatlar to‘qnashuvi mavjud bo‘lgan taqdirda, yoki ish ishtirokchilaridan biriga bo‘ysunadigan holatda jarayonda qatnasha olmaydi. Shu kabi cheklovlar tarjimonlar, mutaxassislar va guvohlarga nisbatan ham tatbiq etiladi.
Rad etish yoki o‘zini o‘zi rad etish to‘g‘risidagi talabni sud ishtirokchisi, shuningdek javobgar, jabrlanuvchi, prokuror yoki ularning vakillari bildirishlari mumkin. Ushbu talablar darhol ko‘rib chiqilib, tegishli qaror qabul qilinadi.
Qonun tashabbuskorlarining ta’kidlashicha, mazkur mexanizmning joriy etilishi ma’muriy ishlarning adolatli ko‘rib chiqilishini kafolatlab, sud jarayonlarida ochiqlik va ishonchlilikni ta’minlaydi.
