Putin 2026-yilda Qozog‘istonga tashrif buyurish taklifini qabul qildi
Bu Rossiya prezidentining 2022-yilda Ukrainadagi harbiy harakatlar boshlanganidan buyon Qozog‘istonga amalga oshiradigan beshinchi safari bo‘ladi.
Rossiya Prezidenti Vladimir Putin Qozog‘iston Prezidenti Qosim-Jomart To‘qayevning 2026-yilda Qozog‘istonga tashrif buyurish taklifini qabul qildi. Bu haqda Kreml matbuot xizmati ma’lum qildi.
Putin davlat OAVlariga bergan izohida: “Rahmat, men mamnuniyat bilan Qozog‘istonga kelaman”, — deya ta’kidladi. Mazkur tashrif Rossiya Prezidentining 2022-yilda Ukrainadagi harbiy harakatlar boshlanganidan buyon Qozog‘istonga amalga oshiradigan beshinchi safariga aylanadi. Tashrifning aniq sanasi keyinchalik e’lon qilinadi.
Ma’lumki, Qozog‘iston Rossiya va Xitoy o‘rtasida joylashgan bo‘lib, Ukrainadagi mojaro davomida diplomatik muvozanatni saqlab qolishga intilmoqda.
Shu haftada Moskvada o‘tgan muzokaralar chog‘ida Prezident To‘qayev AQShga qilgan tashrifi natijalari yuzasidan Putinga batafsil ma’lumot berdi. Kreml matbuot kotibi Dmitriy Peskovning so‘zlariga ko‘ra, ikki davlat rahbarlari uchrashuvda qo‘shma iqtisodiy loyihalarni muhokama qildi hamda Qozog‘istonda faoliyat yuritayotgan Rossiyaning yirik neft kompaniyalari — “Lukoyl” va “Rosneft” korxonalari faoliyatiga AQSh sanksiyalarining ta’siri yuzasidan fikr almashdi.
Uchrashuv yakunida tomonlar Rossiya va Qozog‘iston o‘rtasidagi strategik sheriklikni mustahkamlash, savdo-iqtisodiy hamkorlikni yanada kengaytirish hamda 2024-yilda tovar ayirboshlash hajmini 30 milliard dollargacha yetkazish yo‘lida hamkorlikni davom ettirishga kelishib oldilar.
Putin To‘qayevning Moskvaga tashrifi ikki tomonlama munosabatlarni “hukumatlararo yuqori darajaga ko‘targanini” alohida ta’kidladi.
