Qashqadaryoda uyida qariyb 21 kg marixuana saqlagan shaxs ushlandi
Ilgari ham ikki marta sudlangan fuqaro giyohvandlik moddasini sotish maqsadida yetishtirgan.
O‘zbekiston huquq-tartibot idoralari tomonidan giyohvandlik vositalarining noqonuniy aylanishiga qarshi kurashish bo‘yicha muntazam ravishda tezkor tadbirlar o‘tkazilmoqda.
Dunyo bo‘yicha 400 milliondan ortiq inson giyohvandlik balosiga duchor bo‘lgan bo‘lib, bu illat tufayli har yili qariyb 300 ming kishi hayotdan ko‘z yumadi. Shu bois mazkur yo‘nalishdagi jinoyatlarga qarshi kurash davlat xavfsizligi tizimi e’tibor markazida qolmoqda.
Shu doirada, Davlat xavfsizlik xizmati Qashqadaryo viloyati bo‘yicha boshqarmasi hamda viloyat ichki ishlar boshqarmasi xodimlari hamkorligida Chiroqchi tumanida tezkor tadbir o‘tkazildi.
Tadbir davomida, 1981-yilda tug‘ilgan, ilgari ikki marotaba sudlangan shaxsning yashash xonadoni ko‘zdan kechirilganda, u yerda 3 dona sintetik qopda saqlanayotgan 20 kilogramm 658 gramm marixuana giyohvandlik vositasi borligi aniqlandi.
Aniqlanishicha, fuqaro mazkur moddani kelgusida sotish va noqonuniy daromad orttirish maqsadida yetishtirgan.
Hozirda unga nisbatan O‘zbekiston Respublikasi Jinoyat kodeksining 273-moddasi (giyohvandlik vositalari yoki ularning analoglarini o‘tkazish) 5-qismi bilan jinoyat ishi qo‘zg‘atilib, qamoq ehtiyot chorasi qo‘llanilgan.
Mazkur moddaning 5-qismida belgilanganidek, bunday turdagi jinoyatlar uchun 10 yildan 20 yilgacha ozodlikdan mahrum etish jazosi nazarda tutilgan.
