Shavkat Mirziyoyev: Markaziy Osiyo yangi davr ostonasida
Davlat rahbari “Yangi O‘zbekiston” gazetasida chop etilgan maqolasida Markaziy Osiyo davlatlari o‘zaro ishonch va hamkorlikning yangi bosqichiga kirganini ta’kidladi.
Prezident Shavkat Mirziyoyevning “Yangi O‘zbekiston” gazetasining 2025-yil 13-noyabr kungi 234-sonida e’lon qilingan “Markaziy Osiyo yangi davr ostonasida” sarlavhali maqolasida mintaqaning bugungi taraqqiyot yo‘nalishlari va istiqbollari keng yoritilgan.
Davlat rahbari ta’kidlaganidek, Markaziy Osiyo o‘z taraqqiyotining yangi, tarixiy bosqichiga qadam qo‘ymoqda. Unga ko‘ra, bu jarayon o‘z-o‘zidan yuzaga kelmagan, balki mintaqa mamlakatlari rahbarlarining siyosiy irodasi, aniq maqsadga yo‘naltirilgan sa’y-harakatlari va o‘zaro ishonchga asoslangan hamkorlik siyosati natijasidir.
Prezident mintaqada birinchi bor mustahkam o‘zaro ishonch, yaxshi qo‘shnichilik va hurmat muhiti shakllanganini, bu esa mamlakatlar o‘rtasida yangi bosqichdagi birdamlik va o‘zaro tushunish tamoyillarini kuchaytirayotganini ta’kidladi.
Shavkat Mirziyoyev Markaziy Osiyo davlatlari rahbarlarining Maslahat uchrashuvlari mintaqada yangi muloqot arxitekturasini yaratganini, Toshkentda bo‘lib o‘tadigan navbatdagi sammit esa barqaror, o‘zaro bog‘liq va farovon Markaziy Osiyoni barpo etishda yangi bosqichni boshlab berishini qayd etdi.
Davlat rahbari maqolada shuningdek, mintaqaviy hamkorlikni mustahkamlash siyosiy maqsad emas, balki strategik zaruratga aylanganini, bu jarayon Markaziy Osiyoni barqarorlik, bunyodkorlik va o‘zaro ishonch maskaniga aylantirganini alohida ta’kidladi.
