Toshkentda 100 dan ortiq ekologik me’yorlarni buzgan xo‘jalik faoliyati to‘xtatildi
4,8 mingdan ortiq obyekt o‘rganilib, havoni ifloslantiruvchi manbalar bo‘yicha qat’iy choralar belgilandi.
Toshkent shahri hamda Toshkent viloyatida ekologik xavfsizlik talablariga rioya etmagan 106 ta xo‘jalik yurituvchi subyektning faoliyati vaqtincha to‘xtatildi. Shuningdek, dudburonlardan foydalanish qoidalarini buzgan 58 ta issiqxona xo‘jaligiga nisbatan ma’muriy jarima qo‘llanildi.
Bu chora-tadbirlar O‘zbekiston Respublikasi Vazirlar Mahkamasining 2025-yil 8-fevraldagi 59-F-son farmoyishi ijrosi doirasida amalga oshirilmoqda. Farmoyishda poytaxt va viloyat hududlarida atmosfera havosini muhofaza qilish, chiqindilarni kamaytirish hamda zararli gaz va tutun chiqishini nazorat qilish bo‘yicha aniq vazifalar belgilangan.
Ekologiya, atrof-muhitni muhofaza qilish va iqlim o‘zgarishi vazirligi, Bosh prokuratura hamda Toshkent shahri va viloyati hokimliklari tomonidan 300 dan ortiq mutaxassislardan iborat ishchi guruhlar tuzildi. Ular tomonidan 4 869 ta obyekt o‘rganilib, shundan 595 tasi issiqxona xo‘jaliklari, 2 265 tasi ijtimoiy soha obyektlari, 1 998 tasi esa sanoat va qurilish korxonalarini tashkil etdi.
Tekshiruvlar natijasida ayrim xo‘jaliklarda zararli kimyoviy, fizik va biologik moddalarning havoga chiqarilishi, shuningdek, ekologik me’yorlarga zid faoliyat yuritish holatlari aniqlandi. Har bir qonunbuzilish bo‘yicha tegishli choralar ko‘rildi: 106 xo‘jalik faoliyati vaqtincha to‘xtatildi, 58 issiqxona jarimaga tortildi, 387 holat bo‘yicha rasmiy ogohlantirish xatlari yuborildi.
Ekologik nazorat tadbirlari muntazam davom ettirilmoqda. Mazkur ishlar poytaxt va viloyatlarda havoning sifatini yaxshilash, aholi salomatligini muhofaza qilish hamda barqaror ekologik muhitni ta’minlashga qaratilgan.
