Venesuelada harbiy safarbarlik eʼlon qilindi
AQSH kemalari va harbiy qo‘shinlarining Karib dengizida to‘planishi ortidan Venesuela mamlakatida harbiy safarbarlik joriy qilindi.
Mudofaa vaziri Vladimir Padrino Lopesning so‘zlariga ko‘ra, quruqlik, havo, dengiz va zaxira kuchlari chorshanbagacha mashg‘ulotlar o‘tkazadi. U bu harbiy harakatni AQSH tomonidan kelayotgan “imperialistik tahdid”ga javob sifatida tasvirladi. Bu haqda CNN xabar qildi.
Mashg‘ulotlarda muntazam harbiy bo‘linmalar bilan birga Bolivarcha militsiya ham ishtirok etadi — bu fuqarolardan tashkil topgan zaxira kuch bo‘lib, uni marhum prezident Ugo Chaves yaratgan. U Simon Bolivar — Ispaniyadan mustaqillik uchun kurashgan bir qator Lotin Amerikasi mamlakatlari ozodlik yetakchisi nomi bilan atalgan.
Mudofaa vaziri bu buyruqni to‘g‘ridan-to‘g‘ri prezident Nikolas Maduro berganini aytib, mashg‘ulotning maqsadi boshqaruv, nazorat va aloqa tizimini takomillashtirish hamda mamlakat mudofaasini taʼminlash ekanini taʼkidladi.
Bu harakat ikki davlat o‘rtasidagi keskinlik kuchayayotgan bir paytda amalga oshirilmoqda. Seshanba kuni AQSH harbiy-dengiz kuchlari AQSHning eng yirik harbiy kemasi — “USS Gerald R. Ford” aviatashuvchisi — Lotin Amerikasining katta qismini o‘z ichiga olgan AQSHning Janubiy qo‘mondonligi hududiga yetib kelganini eʼlon qilgan edi.
