YUNESKO O‘zbekiston xalqiga va Prezidentga chuqur minnatdorlik bildirdi
43-Bosh konferensiya Samarqandda yuqori darajada o‘tkazilgani xalqaro miqyosda e’tirof etildi.
YUNESKO tashkiloti Samarqand shahrida 30-oktyabr - 14-noyabr kunlari bo‘lib o‘tgan 43-Bosh konferensiyaning yuqori saviyada tashkil etilgani uchun O‘zbekistonga minnatdorlik bildirdi.
Tashkilot o‘z murojaatida O‘zbekiston xalqi va hukumatiga, xususan, Prezident Shavkat Mirziyoyevga Bosh konferensiyani o‘tkazishda ko‘rsatgan yordami, e’tibori va shaxsiy ishtiroki uchun samimiy va chuqur minnatdorchilik izhor etdi.
Shuningdek, YUNESKO O‘zbekiston tomonidan barcha a’zo davlatlar, assotsiatsiyalashgan a’zolar va kuzatuvchilarning to‘liq ishtirokini ta’minlashga qaratilgan sa’y-harakatlarni yuksak baholadi.
Tashkilot o‘z murojaatida O‘zbekistonning qadimiy madaniy merosi va boy sivilizatsiyasi konferensiya ishtirokchilari o‘rtasida do‘stlik va uyg‘unlik ruhini mustahkamlashga katta hissa qo‘shganini alohida ta’kidladi.
Murojaat yakunida YUNESKO O‘zbekiston xalqi va hukumatiga do‘stlik va o‘zaro hurmat izhor etib, tashkilot bilan hamkorlikning yanada rivojlanishiga ishonch bildirdi.
