Hisob palatasi “Davlat auditi” dasturidan foydalanish tartibini belgiladi
Yangi tartib davlat moliyaviy nazoratini raqamlashtirishni jadallashtirishi kutilmoqda.
Adliya vazirligi “Davlat moliyaviy nazorat organlari va ichki audit xizmatlari tomonidan ‘Davlat auditi’ dasturiy kompleksidan foydalanish tartibi to‘g‘risida”gi nizomni ro‘yxatdan o‘tkazdi. Hujjatga ko‘ra, endilikda barcha nazorat tadbirlari yagona elektron tizim orqali ro‘yxatga olinadi va Hisob palatasi bilan majburiy ravishda kelishiladi.
Yangi tartib tizimdan foydalanadigan subyektlar uchun aniq vakolatlarni belgilaydi. Rahbar va ularning o‘rinbosarlari “tasdiqlovchi”, tarkibiy bo‘lim boshliqlari “ma’qullovchi”, ichki audit xodimlari esa “operator” sifatida tizimga kirish huquqiga ega bo‘ladi. Operator bo‘lmagan boshqa xodimlarga esa “foydalanuvchi” maqomi beriladi.
Endilikda davlat organlari va tashkilotlar “Davlat auditi” tizimida ro‘yxatdan o‘tish uchun Hisob palatasiga maxsus so‘rovnoma yuboradi. Eng muhimi, tizimda qayd etilmagan har qanday nazorat yoki audit tadbiri endi noqonuniy deb hisoblanadi. Bu esa tekshiruvlarning oshkoraligi va tartibga solinganligini yanada kuchaytiradi.
