Madaniy va Maʼrifiy telekanallar: yangi formatlar va xalqaro hamkorlik
Markaziy Osiyo mamlakatlari OAV rahbarlari va mutaxassislari o'rtasida zamonaviy media va xalqaro loyihalar muhokama qilindi.
Islom sivilizatsiyasi markazida "Markaziy Osiyo: umumiy maʼnaviy maʼrifiy meros – umumiy kelajak” xalqaro kongressi doirasida "Madaniy va Maʼrifiy telekanallar: yangi formatlar va xalqaro hamkorlik mavzuda yig‘ilish bo‘lib o‘tdi.
Kongress doirasidagi ilm va innovatsiya, anʼana va texnologiya uyg‘unlashgan yangi formatdagi sho‘ba yig‘ilishida O‘zbekiston, Ozarbayjon, Qozog‘iston, Qirg‘iziston, Tojikiston va Turkmaniston OAV rahbarlari, telekanallar prodyuserlari va soha mutaxassislari ishtirok etdi.
Yuqori darajada bo‘lib o‘tgan yig‘ilish qizg‘in kechdi. Tadbirning bosh g‘oyasi –ommaviy axborot vositalari, xususan madaniy-maʼrifiy telekanallar faoliyati samaradorligini oshirish, Markaziy Osiyo mamlakatlarining maʼnaviy va madaniy merosini targ‘ib etish, ilmiy va maʼrifiy qadriyatlarni keng yoritish, shuningdek, global media makonida xalqaro o‘zaro hamkorlik platformasini yaratishdan iborat.
Mazkur sho‘ba yig‘ilishi qadimiy qo‘lyozmalardan tortib to intellektual algoritmlargacha bo‘lgan yo‘l – bu nafaqat texnologiya, balki tafakkur evolyutsiyasi ekani taʼkidlandi.
Shuningdek, raqamli davrda OAV ning o‘rni haqida alohida to‘xtalib o‘tildi. Markaziy Osiyo davlatlarining xususiy va davlat telekanallaridan tashrif buyurgan mutaxassislar o‘z mamlakatlaridagi telekanallar va ularning faoliyati haqida maʼlumot berdi.
Bo‘lib o‘tgan yig‘ilish davomida madaniy-maʼrifiy telekanallarning zamonaviy media maydonidagi o‘rni, hujjatli filmlar, xalqaro kontent almashinuvni kengaytirish, interaktiv dasturlar va raqamli medialarni rivojlantirish, qo‘shma mediaproyektlarni amalga oshirish masalalari muhokama qilindi.
Shuningdek, tadbir doirasida O‘zbekistonda madaniy-maʼrifiy telekanallarning rivojiga bag‘ishlangan videolavha namoyish etildi. Tadbir OAV vakillari bilan ochiq muloqot va savol-javob shaklida yakunlandi.
“Markaziy Osiyoning tarixiy va madaniy merosi: yagona o‘tmish – umumiy kelajak” xalqaro kongressi 15- noyabr kuniga qadar davom etadi.
