O‘zbekistonliklar ruxsat etilmagan joylarga chiqindi tashlab ketgani uchun bir milliardga yaqin pul to‘lagan
Buxoro viloyati eng toza hudud sifatida qayd etilib, atigi ikki holat aniqlangan.
O‘zbekistonda joriy yilning yanvar–noyabr oylarida chiqindilarni ruxsat etilmagan joylarga tashlab ketish bilan bog‘liq 9,8 mingdan ortiq holat qayd etildi. Ekologiya, atrof-muhitni muhofaza qilish ma’lumotlariga ko‘ra, ushbu qoidabuzarliklarning barchasi doimiy monitoring olib boruvchi ishchi guruh tomonidan o‘rnatilgan IP kameralar orqali aniqlangan.
Qayd etilgan holatlarning 2,2 mingiga nisbatan ma’muriy choralar qo‘llanilib, jami 900 million so‘mdan ortiq jarima undirilgan. Yana 7,6 mingta holat yuzasidan esa tergovga qadar tekshiruv ishlari olib borilmoqda, ularga nisbatan keyingi jarayonlar amaldagi tartibda davom ettiriladi.
Statistikaga ko‘ra, avtomashinalardan chiqindi tashlab ketish holatlari qariyb 4 ming marotaba kuzatilgan.
Hududlar kesimida eng ko‘p qoidabuzarliklar Farg‘ona vodiysi viloyatlarida qayd etilgan: Andijonda — 3 ming, Namanganda — 2,9 ming, Farg‘onada — 1,6 ming holat. Keyingi o‘rinlarda Samarqand (taxminan 1 ming), Toshkent viloyati (430 dan ortiq), Surxondaryo (250), Sirdaryo (140 dan ortiq), shuningdek Toshkent shahri va Xorazm viloyati (120 ga yaqin) qayd etilgan.
Navoiy, Qashqadaryo va Jizzax viloyatlarida qoidabuzarliklar soni 100 tadan kamni tashkil etdi. Buxoro viloyati eng toza hudud sifatida qayd etilib, atigi ikki holat aniqlangan.
