Sirdaryoda 3 nafar IIO xodimi pora bilan qo‘lga olingani tanqid qilindi
O‘n oyda Sirdaryo IIB tizimida 96 nafar xodim intizomiy jazoga tortilgan.
Ichki ishlar vazirligi tizimida xizmat intizomi, qonunchilik talablariga rioya etish hamda korrupsiyaga qarshi kurashish borasida qat’iy nazorat davom ettirilmoqda. Tizimda har qanday huquqbuzarlik favqulodda holat sifatida baholanib, mas’ul xodimlarga nisbatan keskin choralar qo‘llanmoqda.
Vazirlik Shaxsiy xavfsizlik bosh boshqarmasi tomonidan o‘tkazilayotgan tezkor tadbirlar davomida mansab vakolatini suiiste’mol qilgan yoki noqonuniy xatti-harakatga yo‘l qo‘ygan xodimlar aniqlanib, ularga nisbatan ma’muriy va jinoiy javobgarlik muqarrarligi ta’minlanmoqda. Har bir bunday holat hududiy bo‘linmalar rahbarlari hamda shaxsiy tarkib ishtirokida alohida muhokama qilinmoqda.
Sirdaryo viloyatida Ichki ishlar vaziri o‘rinbosari D. Nazarmuxammedov boshchiligida o‘tkazilgan navbatdagi tanqidiy yig‘ilishda joriy yilning o‘tgan o‘n oyida erishilgan natijalar, shuningdek, aniqlangan kamchiliklar tahlil qilindi. Unda xodimlar o‘z xizmat vazifalarini mas’uliyat bilan bajarishi, intizomga qat’iy rioya qilishi va korrupsiya holatlariga yo‘l qo‘ymaslik bo‘yicha talablar yana bir bor eslatib o‘tildi.
Shu bilan birga, qonunbuzarlikning oldini olishda faol pozitsiya namoyish etgan, korrupsion takliflar haqida o‘z vaqtida xabar bergan xodimlar rag‘batlantirilgani qayd etildi. O‘tgan o‘n oy davomida Sirdaryo viloyatida xodimlarga pora taklif qilingan 7 ta holat aniqlanib, tegishli choralar ko‘rilgan.
Yig‘ilishda ayrim xodimlarning sustkashligi va xizmatga loqayd munosabati tizimga salbiy ta’sir ko‘rsatayotgani tanqid qilindi. Mavjud intizomiy choralardan tashqari, viloyat bo‘yicha 96 nafar xodimga nisbatan intizomiy jazo qo‘llangan, ikki holatda 3 nafar xodimning jinoyatga aloqadorligi muhokama qilingan.
Vazirlik korrupsion holatlarning oldini olish bo‘yicha barcha hududlarda tezkor-profilaktik tadbirlarni davom ettiradi. Aniqlangan qonunbuzarliklar bo‘yicha qat’iy choralar qo‘llanib, shaxsiy tarkib o‘rtasida muntazam muhokamalar tashkil etiladi.
