Telegram bir sutkada rekord darajada ko‘p kanalni blokladi
Yil davomida o‘chirilgan kanallar soni 34,9 milliondan oshdi.
Telegram 13-noyabr kuni 519 645 ta kanalni bloklaganini ma’lum qildi. Bu koʻrsatkich platforma tomonidan bunday statistika yuritila boshlaganidan beri qayd etilgan eng yuqori natija hisoblanadi.
Kompaniga ko‘ra, blokirovka qilingan kanallar soni bo‘yicha avvalgi rekord joriy yil fevral oyida kuzatilgan bo‘lib, o‘shanda bir sutkada taxminan 500 ming kanal o‘chirib tashlangan edi. Telegram blokirovka statistikasi 2023-yil oxiridan boshlab muntazam ravishda shakllantirilib kelmoqda.
Ma’lumotlarga ko‘ra, yil boshidan buyon messenjer ma’muriyati jami 34,9 milliondan ortiq kanal va guruhlarni bloklagan. Shundan 856 mingdan ortig‘i bolalarga nisbatan zo‘ravonlik tasvirlarini tarqatgan, 207 mingdan ortig‘i esa terroristik faoliyat bilan bog‘liq guruh sifatida aniqlangan.
Telegram foydalanuvchilarga zararli kontent haqida darhol xabar berish imkonini beradi. Postni bosib turish orqali “shikoyat qilish” menyusi ochiladi va istalgan qoidabuzarlik turi bo‘yicha murojaat yuborish mumkin.
Platformaga ko‘ra, zo‘ravonlikka undash, bolalarga zarar yetkazish, noqonuniy mahsulot savdosi, firibgarlik, shaxsiy ma’lumotlarni tarqatish, spam va mualliflik huquqini buzish bilan bog‘liq kontent shikoyatlar asosida o‘chiriladi. Shuningdek, “qonunni buzmaydi, lekin o‘chirilishi kerak” degan alohida toifa ham mavjud.
Telegramning moderatsiya mexanizmi 2015-yildan buyon foydalanuvchi shikoyatlari va mashinani o‘rganish texnologiyalarini birlashtirgan holda faoliyat yuritadi. 2024-yil boshida tizim sun’iy intellekt asosidagi ilg‘or vositalar bilan kengaytirildi.
Messenjer asoschisi Pavel Durovning Parijda hibsga olinishi moderatsiya siyosati bo‘yicha xalqaro bahs-munozaralarga sabab bo‘lgandi. Hibsga olish Telegramning kontentni yetarlicha nazorat qilmasligi hamda Fransiya huquq-tartibot organlari bilan hamkorlik qilmaganlik ehtimoli bo‘yicha tergov doirasida amalga oshirilgan.
Shundan so‘ng platformaning moderatsiya siyosati yangilandi. Pavel Durovning aytishicha, Telegram 2018-yildan beri qonuniy so‘rovlarga javoban jinoyatchilarning IP-manzillari va telefon raqamlarini huquqni muhofaza qiluvchi organlarga taqdim etib keladi.
