Bojxona: 1 trillion so‘mlik kontrabanda tovarlari to‘xtatib qolindi
Bojxona qo‘mitasi o‘tgan 10 oylik faoliyat davomida taqiqlangan moddalar va noqonuniy tovarlar bo‘yicha katta ko‘rsatkichlarni e’lon qildi.
O‘zbekiston bojxona organlari 2025-yilning o‘tgan o‘n oyi davomida giyohvand moddalar, qurol-yarog‘ va tamaki mahsulotlarining noqonuniy muomalasiga qarshi kurashishda sezilarli natijalarga erishdi. Tizim xodimlari tomonidan yirik miqdordagi taqiqlangan moddalar va kontrabanda tovarlarning oldi olindi.
Bojxona qo‘mitasi ma’lumotlariga ko‘ra, amalga oshirilgan tezkor tadbirlar natijasida 1 tonna 610 kilogramm narkotik vositalar, shuningdek 1 tonna 55 kilogrammdan ortiq psixotrop va kuchli ta’sir etuvchi moddalar musodara qilingan.
Shu bilan birga, noqonuniy aylanmadan 137 dona o‘qotar va tig‘li qurol, 566 dona turli kalibrdagi o‘q-dorilar, 44,5 milliard so‘m qiymatdagi tamaki mahsulotlari ham olib qo‘yilgan.
Bojxona xodimlari tomonidan qiymati qariyb 1 trillion so‘mlik tovarlarning noqonuniy muomalasiga chek qo‘yildi. Ular orasida 73,3 milliard so‘mlik xorijiy valyuta, 114,1 milliard so‘mlik zargarlik buyumlari va boshqa tovarlar mavjud.
Bojxona organlari tomonidan ko‘rilayotgan tizimli choralar mamlakat iqtisodiy xavfsizligini mustahkamlash, kontrabanda va jinoyatchilikning oldini olishga xizmat qilmoqda.
