Donald Tramp BBC'ni sudga bermoqchi
Korporatsiya o‘tgan hafta prezident nutqining ayrim qismlarini noto‘g‘ri tahrir qilgani uchun rasmiy uzr so‘ragan bo‘lsa-da, efirdagi ko‘rinishlarni rad etish va moddiy kompensatsiya to‘lashdan bosh tortgan.
AQSh prezidenti Donald Tramp Britaniyaning BBC korporatsiyasi ustidan sudga murojaat qilish niyatida ekanini ma’lum qildi. Unga ko‘ra, “Panorama” dasturi uchun tayyorlangan hujjatli filmda 2021-yil 6-yanvar kuni Capitoliy voqealari arafasida aytilgan nutqining ayrim qismlari noto‘g‘ri tahrir qilingani va haqiqiy mazmun buzib ko‘rsatilgani prezident tomonidan manipulyatsiya sifatida baholangan.
Trampning bildirishicha, BBC uning nutqining turli epizodlarini birlashtirib, vaziyatni noto‘g‘ri talqin qilgan. Korporatsiya o‘tgan hafta mazkur montaj xatosi uchun rasmiy uzr so‘ragan bo‘lsa-da, efirdagi ko‘rinishlarni rad etish yoki moddiy kompensatsiya to‘lashdan bosh tortgan.
Mazkur holatdan so‘ng Trampning yuridik jamoasi BBC ustidan 1 milliard dollardan 5 milliard dollargacha bo‘lgan miqdorda da’vo bilan sudga murojaat qilishini bildirgan. Da’vo doirasida efirdagi noto‘g‘ri ma’lumotlarni raddiya qilish, rasmiy uzr so‘rash va moddiy tovon undirish talab qilinadi.
Trampning aytishicha, ushbu sud arizasi “katta ehtimol bilan kelasi hafta” taqdim etiladi. Filmda uning 2021-yil 6-yanvardagi chiqishidan ikki turli parchani birlashtirish orqali bitta epizod sifatida namoyish etilgani, prezident tomonidan “qasddan noto‘g‘ri yoritish” deb baholangan. BBC esa montaj xatosini tan olgan, biroq moliyaviy javobgarlikni qabul qilmagan.
