Markaziy Osiyo tashqi ishlar vazirlari uchrashdi
Oʻzbekiston, Qirgʻiziston va Tojikiston Respublikalari oʻrtasida uch davlatning davlat chegaralari tutashgan nuqtalari toʻgrisidagi Shartnoma ratifikatsiya yorliqlari bilan almashish to‘g‘risidagi Bayonnoma imzolandi.
Bugun, 15-noyabr kuni Toshkentda Markaziy Osiyo davlatlari tashqi ishlar vazirlarining navbatdagi yig‘ilishi bo‘lib o‘tfi. Unda ilk bora Ozarbayjon tashqi ishlari vaziri ham ishtirok etdi. Bu haqda Zamon.uz muxbiri Shohjahon Majidov xabar qildi.
Mazkur tadbirda O‘zbekiston tashqi ishlar vaziri Baxtiyor Saidov, Qozog‘iston tashqi ishlar vaziri Yermek Kosherbayev, Qirg‘iziston tashqi ishlar vaziri Jeenbek Kulubayev, Tojikiston tashqi ishlar vaziri Sirojiddin Muhriddin va Turkmaniston tashqi ishlar vaziri o‘rinbosari Serdar Muhammetdurdiyev, hamda Ozarbayjon tashqi ishlar vaziri Jeyhun Bayramov ishtirok etdi.
Tomonlar Markaziy Osiyo davlatlari rahbarlarining yettinchi Maslahat uchrashuvi kun tartibiga oid masalalar, asosiy qarorlar hamda mintaqaviy hamkorlikni belgilovchi hujjatlarni muhokama qildilar.
Muzokaralar davomida hamkorlikni mustahkamlash hamda mintaqaning umumiy farovonligini rivojlantirishga xizmat qiluvchi imkoniyatlar ko‘rib chiqildi.
Uchrashuv ishtirokchilari integratsiyani chuqurlashtirish, o‘zaro ishonchni mustahkamlash va umumiy vazifalarni hamkorlikda hal etish masalalari yuzasidan fikr almashdi.
