Misrlik ayol bir vaqtning o‘zida to‘qqiz farzandga homilador bo’ldi

Misrda tibbiyot jamoatchiligini hayratga solgan juda kam uchraydigan holat qayd etildi. UZI tekshiruvi davomida bir ayolning birdaniga to‘qqiz nafar bolaga homilador ekani aniqlangan. Bu haqda “Al-Arabiya” xabar berdi.

 

Shifokorlarning aytishicha, ushbu noodatiy homiladorlikka tuxumdon faoliyatini rag‘batlantiruvchi dori vositalaridan nazoratsiz foydalanish sabab bo‘lgan bo‘lishi mumkin. Mutaxassislar bunday holat ona va homila uchun juda yuqori xavf tug‘dirishini ta’kidlashmoqda.

 

Mazkur holat oila uchun ham kutilmagan bo‘lib, tekshiruv natijalari er-xotin va shifokorlarni hayratda qoldirgan. Ginekolog Voil al-Banno bunga bir nechta omillar uyg‘unlashuvi sabab bo‘lganini, bunday holat tibbiyotda nihoyatda noyob uchrashini qayd etdi. Mutaxassisga ko‘ra, vaqtida tibbiy aralashuv orqali homilalar sonini kamaytirish ona salomatligini himoya qiladi va qolgan bolalarning rivoji uchun eng yaxshi sharoit yaratadi.

 

Eslatib o‘tamiz, avvalroq Qashqadaryo viloyatining Qarshi shahrida to‘rt egizak qizaloq dunyoga kelgani haqida xabar berilgandi.