Rossiya tomonidan Kiyevga uchirilgan raketalardan biri Ozarbayjon elchixonasiga tushdi

 

2025-yil 14-noyabr kuni Rossiya Federatsiyasining Ozarbayjon Respublikasidagi Favqulodda va muxtor elchisi Mixail Yevdokimov Ozarbayjon Respublikasi Tashqi ishlar vazirligiga chaqirildi.

 

Uchrashuv davomida 14-noyabr kuni taxminan soat 01:00 da Ukraina poytaxti Kiyevga qilingan raketa va dron hujumlari oqibatida Ozarbayjonning Kiyevdagi Elchixonasi hududiga “Iskander” turidagi raketalardan biri tushgani munosabati bilan Rossiya tomoniga qat’iy norozilik bildirildi va tegishli nota-verbal topshirildi.

 

Uchrashuvda ushbu portlash oqibatida elchixona perimetri devorining bir qismi butunlay vayron bo‘lgani, binolar, xizmat avtomobillari, ma’muriy inshoot va konsullik bo‘limiga jiddiy zarar yetgani, diplomatik vakolatxona hududida katta talafot kuzatilgani ta’kidlandi. Hodisa oqibatida inson talofati yo‘qligi qayd etildi.

 

Shuningdek, mazkur hujumlar xalqaro huquq normalari va tamoyillariga zid ekani, bunday holatlar avval ham takrorlangan eslatildi. Xususan:

• 2022-yil 10-mart kuni Xarkov shahridagi Ozarbayjonning Faxriy konsulxonasi binosiga qilingan aviazarbadan so‘ng inshoot jiddiy zarar ko‘rgan, xizmat avtomobili yaroqsiz holga kelgan;
• 2024-yil 2-yanvar kuni Rossiya tomonidan “Kinzhal” raketasi bilan amalga oshirilgan hujum natijasida elchixona binosidan 35 qadam narida 3 metrli chuqurlik paydo bo‘lgan, 8 metr pastlikda portlamay qolgan jangovar qismlar aniqlangan;
• 2025-yil 28-avgust kuni elchixona yaqiniga qilingan navbatdagi aviazarbadan so‘ng ma’muriy bino, konsullik bo‘limi va elchi rezidensiyasi zarar ko‘rgan;
• 2025-yil 8 va 18-avgust kunlari Odessa viloyatidagi SOCAR neft omboriga dron hujumlari uyushtirilib, xodimlar jarohatlangan va infratuzilma jiddiy shikastlangan.

 

Mazkur faktlar hujumlarning ehtimoliy qasddan amalga oshirilganiga doir jiddiy savollar tug‘dirayotgani ta’kidlandi.

 

Uchrashuvda, shuningdek, Ozarbayjon tomoni bu holatlar haqida avval ham rasmiy nota-verballar orqali Rossiya tomonini xabardor qilgani, 2022-yil aprel oyidayoq Ukrainadagi Ozarbayjon diplomatik vakolatxonalarining koordinatalari Rossiya Mudofaa vazirligiga taqdim etilgani eslatib o‘tildi. O‘sha paytda Rossiya tomoni mazkur koordinatalar inobatga olinishi bo‘yicha kafolat bergan edi.

 

Yig‘ilish yakunida Ozarbayjon diplomatik vakolatxonalariga qaratilgan bunday hujumlar mutlaqo qabul qilib bo‘lmasligi qat’iy ta’kidlandi. Rossiya tomonidan voqea yuzasidan keng qamrovli tergov o‘tkazish va batafsil izoh taqdim etish so‘raldi.