Sirdaryoda shifokorni kaltaklagan erkak 15 sutkaga qamaldi
U rashk sababli xotinini tekshiruvdan o‘tkazayotgan shifokor bilan janjallashgan.
Sirdaryo viloyatida shifokor faoliyatiga aralashuv bilan bog‘liq noxush holat yuz berdi. Ijtimoiy tarmoqlarda tarqalgan videomateriallarda bemor ayolning turmush o‘rtog‘i rashk sababli navbatchi shifokor bilan janjalga aralashgani aks etgan. Viloyat IIB holat yuzasidan rasmiy ma’lumot berdi.
Joriy yilning 9-noyabr kuni soat 00:25 da Mirzaobod tuman IIBga “102” xizmatiga kelgan xabarga ko‘ra, tumandagi Yuqumli kasalliklar shifoxonasida bemor yaqinlari o‘rtasida janjal chiqqani bildirilgan.
Voqea joyiga yetib borgan profilaktika inspektorlari bemor D.X. turmush o‘rtog‘i S.X. va o‘g‘li A.X. tomonidan shifoxonaga olib kelinganini aniqladi. Ko‘rik jarayonida navbatchi shifokor R.B. bemorni qo‘lidan ushlab o‘tirishga ko‘maklashgani va qorin sohasidagi og‘riqni aniqlash maqsadida tekshiruv o‘tkazayotgani paytda bemorning eri rashk sababli shifokor bilan janjallashib qolgan.
Tekshiruv doirasida shifokor R.B. sud-tibbiy ekspertizasidan o‘tkazildi va unda tan jarohati yoki shikast izlari qayd etilmadi.
To‘plangan materiallar Jinoyat ishlari bo‘yicha Mirzaobod tuman sudida ko‘rib chiqildi. Sud qaroriga ko‘ra, fuqaro S.X. Ma’muriy javobgarlik to‘g‘risidagi kodeksning 183-moddasi (mayda bezorilik) hamda 197¹⁷-moddasi (tibbiyot xodimining qonuniy faoliyatiga to‘sqinlik qilish) talablarini buzgan deb topilib, unga 15 sutka ma’muriy qamoq jazosi tayinlandi.
