Dunyoda birinchi marta homilador ayol qornini ochmasdan operatsiya qilindi
Robot yordamida o‘tkazilgan noyob muolaja ona va chaqaloq hayotini asrab qoldi.
Isroilning Petah-Tikva shahridagi Rabin tibbiyot markazida shifokorlar tibbiyot tarixida ilk bor homiladorlikning kech davrida qorin bo‘shlig‘ini ochmasdan murakkab jarrohlik amaliyoti o‘tkazishga muvaffaq bo‘ldi. Ushbu noyob muolaja 23 yoshli Tsofiya Leibovich hayotini saqlab qolish va homilasini xavfsiz davom ettirishga xizmat qildi.
Ayol homiladorlikning 32-haftasida shoshilinch ravishda kasalxonaga yotqizilgan, shifokorlar esa odatda erta tug‘ruqqa sabab bo‘ladigan ochiq jarrohlik o‘rniga robotlashtirilgan laparoskopik usulni qo‘llashga qaror qilishgan. Bu usul jarrohga qorin bo‘shlig‘ini katta kesmasdan, faqat kichik teshiklar orqali operatsiyani bajarish imkonini bergan.
Natija esa kutilganidan ham yaxshi bo‘ldi: Tsofiya operatsiyadan keyin homiladorlikni muvaffaqiyatli davom ettirdi va bir necha hafta o‘tib sog‘lom qizaloqni dunyoga keltirdi.
Mutaxassislarning aytishicha, bunday jarrohlik avval homiladorlikning so‘nggi oylarida hech qachon qo‘llanmagan va bu texnologiya kelajakda ko‘plab ayollar hayotini saqlab qolishi mumkin.
