Hindistonda politsiya bo‘limida dahshatli portlash yuz berdi
“Tasodifiy portlash” deb baholanayotgan voqea bo‘yicha tergov davom etmoqda.
Hindiston shimolidagi Kashmir mintaqasida joylashgan politsiya bo‘limida sodir bo‘lgan kuchli portlash ortidan kamida 9 kishi halok bo‘ldi, 32 nafar fuqaro esa turli darajada jarohat oldi.
Portlash 14-noyabr kuni kechasi, taxminan soat 23:00 da yuz bergan. Vafot etganlar orasida politsiya xodimlari, davlat tashkilotlarida ishlovchi mutaxassislar hamda portlovchi moddalarni o‘rganayotgan kriminalistlar bo‘lgan.
Rasmiy ma’lumotlarga ko‘ra, portlashga 360 kilogramm miqdorda ammoniy nitrat saqlanayotgan joydagi texnik nosozlik sabab bo‘lgan bo‘lishi mumkin. Tergovchilar hozircha hodisa “tasodifiy portlash” bo‘lgani, harbiylar yoki terrorchilar ishtiroki aniqlanmaganini bildirmoqda.
Kuchli portlash oqibatlari juda dahshatli: ayrim jasad qismlari voqea joyidan 100 metr va undan uzoq masofadan topilgan. Bir nechta tanalar shunchalik kuyib ketganki, ularni aniqlash ishlari davom etmoqda. Binoning katta qismi vayron bo‘lgan, stansiyadagi avtomobillar yongan, atrofdagi uylar oynalari sinib ketgan. Portlash zarbasi hatto bir necha kilometr narida ham sezilgan.
Voqea mintaqada xavfsizlik borasidagi keskin vaziyat fonida sodir bo‘ldi. Atigi 4 kun avval Dehlida avtomobil portlashi oqibatida 8 kishi halok bo‘lgandi va o‘nlab odamlar jarohatlangandi. O‘sha voqea Hindiston hukumati tomonidan “terrorchilik hujumi” sifatida baholangan edi.
Kashmir hududi Qo‘shni Pokiston bilan o‘nlab yillardan buyon davom etayotgan keskinlik markazida bo‘lib keladi. Hudud ustidan ikki davlat ham da’vo qilmoqda va amalda u bo‘lib boshqariladi.
