Toshkent havosi yana xavfli darajaga yetdi
PM10 zarrachalari miqdori me’yordan 1,2 baravar yuqori ekani ma’lum bo‘lgan.
Toshkentda atmosfera havosi sifatini kuzatish stansiyalari 16 noyabr kuni kechqurun juda xavotirli ko‘rsatkichlarni qayd etdi. PM10 zarrachalari miqdori me’yordan 1,2 baravar, eng xavfli hisoblangan PM2.5 esa qariyb 3,5 baravar yuqori ekani ma’lum bo‘ldi. Bu zarrachalar nafas yo‘llari orqali oson kirib, sog‘liq uchun jiddiy xavf tug‘diradi.
UzGidromet mutaxassislarining ta’kidlashicha, keskin harorat o‘zgarishi tufayli atmosfera qatlamida inversiya jarayoni yuzaga kelgan — aynan shu holat mayda zarrachalarning yer sathiga yaqin qolib ketishiga va havo ifloslanishining ortishiga sabab bo‘lgan. Afsuski, bu vaziyat respublika hududida bir necha kun saqlanib qolishi kutilmoqda.
