“Falastin davlati bo‘lishi mumkin emas” - Isroil rasmiylari

 

Isroil Bosh vaziri Binyamin Netanyaxu BMT Xavfsizlik Kengashida G‘azo bo‘yicha Falastin mustaqilligiga doir eshiklarni ochiq qoldiruvchi AQSh rezolyutsiyasi ovozga qo‘yilishidan bir kun avval Falastin davlati tuzilishiga qarshi ekanini yana bir bor ta’kidladi. Shuningdek Isroil mudofaa vaziri Israel Katz ham “Falastin davlati bo‘lmaydi, G‘azo esa sektori qurolsizlantiriladi” deb ta'kidladi.

 

Netanyaxu uzoq yillardan buyon Falastin davlatining tashkil etilishi XAMASni “mukofotlash” bo‘lishini, bu esa oxir-oqibat Isroil yaqinida XAMAS nazoratidagi yanada yirik davlat paydo bo‘lishiga olib kelishi mumkinligini aytib kelmoqda. Biroq AQSh G‘azoda o‘t ochishni to‘xtatish bo‘yicha tashabbusni ilgari surar ekan, Isroil xalqaro bosim ostida qolgan.

 

AQSh Xavfsizlik Kengashiga taqdim etgan rezolyutsiya loyihasi G‘azoda “xalqaro barqarorlik kuchlari”ni shakllantirish imkoniyatini nazarda tutadi. Taklif Rossiya, Xitoy va ayrim arab davlatlarining qarshiliklariga qaramay ovozga qo‘yilishi kutilmoqda.

 

XAMAS va falastin guruhlari rezolyutsiyani “G‘azoga xalqaro mandat joriy qilish urinishlari” sifatida baholab, bu tashabbus falastinliklarni o‘z taqdirini belgilash huquqidan mahrum qilishi mumkinligini ta’kidladi. Guruhlar xalqaro kuchlar bevosita BMT nazorati ostida, Isroil ishtirokisiz bo‘lishi lozimligini bildirdi.

 

AQSh, rezolyutsiya matnini tanqidlar fonida, Falastinning kelajakdagi davlatchiligiga “ishonchli yo‘l” yaratish haqidagi jumlalarni yanada keskin shaklda qayta ishlab chiqdi. 

Saudiya Arabistoni Qo‘shma Shtatlarga Falastin davlatini tan olish Isroil bilan munosabatlarni normallashtirishning asosiy sharti bo‘lib qolayotganini aytdi. 18-noyabr kuni Saudiya Arabistoni valiahd shahzodasi Muhammad bin Salmon Ol Saud 2018-yildan beri ilk bor Vashingtonga tashrif buyuradi va u yerda AQSh prezidenti Donald Tramp bilan uchrashadi.

 

Isroil rahbari yakshanba kuni Falastin mustaqilligi haqidagi xalqaro da’vatlarga qaramay, Isroilning bu boradagi pozitsiyasi “zarracha o‘zgarmaganini” ta’kidladi.

 

“Menga hech kimning tasdiqlari, tvitlari yoki ma’ruzalari kerak emas”, — dedi u.

 

Netanyaxu Falastin davlatini e’tirof etishni G‘azodagi urush davrida XAMASni rag‘batlantiruvchi omil sifatida baholab, Buyuk Britaniya, Avstraliya va Kanada tomonidan Falastinni tan olinganini keskin qoraladi.

 

Isroil Bosh vaziri G‘arbiy Sohilda yahudiy ko‘chmanchilar tomonidan sodir etilayotgan hujumlar haqida ilk bor ochiq izoh berdi. U bu zo‘ravonliklar “kichik ekstremist guruhlar” tomonidan sodir etilayotganini bildirdi. Biroq falastinliklar va inson huquqlari tashkilotlari zo‘ravonlikning keng quloch yoyganini va hukumat tomonidan ko‘z yumulayotganini aytmoqda.

 

Falastin sog‘liqni saqlash rasmiylarining ma’lumotiga ko‘ra, so‘nggi ikki haftada G‘arbiy Sohilda o‘tkazilgan harbiy operatsiyalar va to‘qnashuvlarda kamida yetti falastinlik, jumladan o‘smirlar halok bo‘lgan.

 

BMT Inson huquqlari bo‘yicha komissari ma’lumotiga ko‘ra, oktabr oyida ko‘chmanchilar tomonidan falastinliklarga qarshi 260 dan ortiq hujum qayd etilgan — bu 2006 yildan beri eng yuqori ko‘rsatkich.

 

Isroil harbiylari yakshanba kuni G‘azo shimolida o‘z pozitsiyalariga tahdid solgan shaxsni o‘ldirganini ma’lum qildi.

 

G‘azo janubidagi Xon Yunisdagi Muvasi chodir lagerida kuchli yomg‘ir sababli ko‘chalarga suv kirib, minglab ko‘chirilgan oilalar og‘ir sharoitda qolmoqda.

 

Ko‘chirilgan aholi vakili Abdulloh Abu Quta shunday dedi: “Bizning chodirlarimiz yirtiq va eskirgan. Yomg‘ir yog‘sa, ichkariga oqib kiradi. Bu azobni so‘z bilan tasvirlab bo‘lmaydi.”