Samarqandda 737 mln so‘mlik noqonuniy oltin savdosi to‘xtatildi
Qo‘lga olingan shaxslardan ikki nafari avval sudlangani aniqlangan.
Davlat xavfsizlik xizmati Qashqadaryo viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari hamkorligida Samarqand viloyatining Kattaqo‘rg‘on tumanida tezkor tadbir o‘tkazildi.
Tadbir davomida Navoiy va Samarqand viloyatlarida yashovchi, 1982, 1984 va 1996-yillarda tug‘ilgan uch nafar fuqaro qonunga xilof ravishda umumiy og‘irligi 475 gramm bo‘lgan ikki bo‘lak oltin quyma sotishga uringan vaqtida qo‘lga olindi. Ular ushbu qimmatbaho metallarni xaridorga 737 million so‘mga sotishga kelishgan bo‘lib, oldindan 500 million so‘m olayotganida ashyoviy dalillar bilan ushlandi.
Davlat asillik darajasi nazorati inspeksiyasi xulosasiga ko‘ra, topilgan 994 proba asillikdagi oltin quymalarning sof og‘irligi 472 gramm bo‘lib, ularning umumiy qiymati 740,4 million so‘mni tashkil etadi.
Hozirda mazkur shaxslarga nisbatan Jinoyat kodeksining 177-moddasi 4-qismi “a” bandi (valyuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilib, tergov harakatlari olib borilmoqda.
Shuni alohida ta’kidlash lozimki, ushbu shaxslardan ikki nafari avval sudlangan bo‘lib, ulardan biri hozirda axloq tuzatish ishlari jazoni o‘tamoqda.
