Samarqandlik sudya bir ish bo‘yicha bir kunda to‘rt xil hukm chiqardi
Huquq faollari sud tizimida tartibsizlik chuqurlashayotganini ta’kidlashmoqda.
Samarqand tuman sudi raisi Nosir Rajabov birgina jinoyat ishi bo‘yicha bir kunning o‘zida to‘rtta turli hukm chiqargani haqida “Ezgulik” jamiyati jamoatchilikka ma’lum qildi. Jamiyat raisi Abdurahmon Tashanovning ta’kidlashicha, barcha hukmlar rasmiy shtrix-kodlar bilan tasdiqlangan bo‘lib, ular orasida sezilarli tafovutlar bor.
Tashanov bu holatni sud tizimidagi chuqur inqiroz belgisi sifatida baholadi. “Sudlar nazorat qilinayotganini bilib, bir-birlarini chalg‘itishga urinayotgandek. Qonuniylik qadri yo‘qolmoqda, hatto ayrim hududlarda ‘soxta jabrdiydalar’ jalb qilish amaliyoti kengaymoqda,” dedi u.
Rasmiylar esa Samarqand viloyati “qonun ustuvorligi bo‘yicha” mamlakatda ikkinchi o‘rinda ekani haqida ma’lumot bergan edi. Ammo huquq faollariga ko‘ra, bunday amaliyotlar sud tizimiga bo‘lgan ishonchni yemirmoqda. Ular prezidentdan vaziyatni shaxsan nazoratga olishni so‘rashmoqda.
