Tramp Rossiya bilan hamkor davlatlarga nisbatan keskin sanksiyalar joriy etilishini e’lon qildi

 

AQSh prezidenti Donald Tramp Kongress tomonidan ilgari surilgan va Rossiya bilan iqtisodiy hamkorlik qilayotgan davlatlarga nisbatan sanksiyalar joriy etishni ko‘zda tutuvchi qonun loyihasini qo‘llab-quvvatlashini ma’lum qildi. Prezident Eronni ushbu ro‘yxatga kiritish ham mumkinligini tan oldi.

 

Tramp Palm-Bichdan Vashingtonga uchishdan avval jurnalistlar savollariga javob berar ekan, quyidagilarni aytdi: “Bu tashabbus haqida eshitganman va men bunga roziman. Respublikachilar Rossiya bilan biznes yuritayotgan har qanday davlatga nisbatan juda qattiq sanksiyalarni nazarda tutuvchi qonun loyihasini taqdim etishmoqda. Bu ro‘yxatga Eron ham kiritilishi mumkin.”

 

Prezidentning so‘zlariga ko‘ra, loyihaga Eronga nisbatan alohida cheklovlar qo‘shish taklifi to‘g‘ridan-to‘g‘ri o‘zidan chiqqan.

 

Qonun loyihasi aprel oyining boshida Senatning ikki partiyali guruhi tomonidan taqdim etilgan bo‘lib, uning asosiy homiylari senator Lindsi Grem va senator Richard Blumental hisoblanadi. Hujjat Rossiyaning savdo hamkorlariga nisbatan ikkilamchi sanksiyalarni nazarda tutadi.

 

Taklifga ko‘ra, Rossiyadan neft, gaz, uran va boshqa strategik tovarlarni xarid qilayotgan davlatlardan AQShga amalga oshiriladigan importga 500 foizlik boj stavkasi qo‘llanishi mumkin.

 

Senator Rend Pol ushbu tashabbusni keskin tanqid qilib, Responsible Statecraft nashriga yozgan maqolasida qonun qabul qilinsa, “eng katta iqtisodiy va strategik zarar aynan Qo‘shma Shtatlarning o‘ziga yetishi” mumkinligini ta’kidladi.