Xonanda Jahongir Otajanovni boshqa bir xonanda milliardlab pulga “uxlatdi”
Xonandalar talabalik davridan aka-uka kabi do‘st bo‘lgan.
O‘zbekistonning mashhur xonandasi Jahongir Otajanov firibgarlik qurboni bo‘ldi. Talabalik davridan aka-uka kabi do‘st bo‘lgan yana bir xonanda H.H. 2,3 milliard so‘m miqdorida pulni o‘zlashtirgan. Firibgarlik jarayonida Otajanovning Lexus va BMW rusumli avtomobillari, uylarini sotib olish va turli xizmatlar evaziga to‘langan pullar talon-toroj qilingan. Bu haqda Toshkent shahar sudlari Zamon.uz'ga ma'lum qildi.
Ma’lumotlarga ko‘ra, H.H. 2017 yildan boshlab Otajanov bilan turli shartnomalar asosida oldi-berdi qilgan, lekin to‘lovlarni amalga oshirmay, o‘z ehtiyojlariga sarflagan. Shu jumladan, mashinalar sotib olinishi, to‘y va uylar bilan bog‘liq bir nechta epizodlar sud hujjatlariga kiritilgan.
Sud jarayonida H.H. qilgan jinoyatni qisman tan olib, zarar yetkazgan pullarni san’at faoliyati uchun ishlatganini aytgan. Shu bilan birga, u zarar yetkazilgan mablag‘ni qaytarishga tayyorligini bildirgan. Sudning yakuniy qaroriga ko‘ra, H.H. O‘zbekiston Jinoyat kodeksining 168-moddasi 4-qismi “a” bandi bo‘yicha aybli deb topildi va 8 yilga ozodlikdan mahrum qilindi.
Shuningdek, H.H. nomiga rasmiylashtirilgan Toshkent shahridagi ikki uy ham sotuvga qo‘yilib, sotuvdan tushgan mablag‘ Otajanovga yetkazilgan moddiy zarar hisobiga yo‘naltiriladi. Shu tariqa, firibgarlik natijasida yetkazilgan zarar qisman qoplangan bo‘ladi.
