Xorazmda Markaziy Osiyodagi eng yirik etanol zavodi quriladi
O‘zbekiston va Hindiston kompaniyalari o‘rtasida imzolangan kelishuv zamonaviy etanol va bioyoqilg‘i ishlab chiqarishni yo‘lga qo‘yadi.
Xorazm viloyatida Markaziy Osiyodagi eng yirik etanol ishlab chiqaruvchi zavod barpo etilishi rejalashtirilmoqda. Tegishli kelishuv O‘zbekistonning Allied Biofuels FE LLC va Hindistonning Praj Industries Ltd kompaniyalari o‘rtasida imzolandi. Loyihaga ko‘ra, Hindiston kompaniyasi zavodga kuniga 890 tonna etanol ishlab chiqarish imkonini beradigan zamonaviy qayta ishlash texnologiyasini taqdim etadi.
Zavod tomonidan ishlab chiqarilgan etanol esa Allied Biofuels FE LLC yoqilg‘i majmuasi uchun asosiy xomashyo sifatida ishlatiladi. Shu orqali mamlakatda bioyoqilg‘i ishlab chiqarish salohiyati sezilarli darajada oshadi.
Shuningdek, yiliga 160 ming tonnadan ortiq aviasiya yoqilg‘isi (SAF) va 5 ming tonnadan ziyod “yashil” dizel ishlab chiqarish rejalashtirilgan. Loyihaning amalga oshishi nafaqat ichki bozorni ta’minlash, balki eksport salohiyatini kengaytirishga ham xizmat qiladi.
