AQShda O‘zbekiston fuqarosi terrorizmda gumonlanib hibsga olindi
U AQShga 2023-yilda noqonuniy kirgan va yuk mashinasi haydovchisi sifatida ishlagan.
AQSh Immigratsiya va bojxona nazorati xizmati (ICE) O‘zbekiston fuqarosi, 31 yoshli Ahror Bozorovni terrorchilik faoliyatiga aloqadorlikda gumonlab hibsga oldi. Bu haqda “Fox News” xabar berdi.
Ma’lumotlarga ko‘ra, Bozorov 2022-yilda O‘zbekistonda terroristik tashkilot faoliyatini targ‘ib qilish va internet orqali jihodga chaqiriqlar tarqatishda ayblanib, qidiruvga berilgan. Shuningdek, u fuqarolarni ekstremistik guruhlarga qo‘shilishga undashda gumon qilinmoqda.
ICE xodimlari uni 9-noyabr kuni Kanzas shtatida yuk mashinasi haydovchisi sifatida ishlayotgan paytda hibsga olgan. Aniqlanishicha, Bozorov 2023-yil fevral oyida AQSh chegarasini noqonuniy kesib o‘tgan. Chegara patruli uni qo‘lga olgan bo‘lsa-da, keyinchalik qo‘yib yuborgan. Shundan so‘ng u AQShda ish ruxsatnomasi va tijorat yuk mashinasi haydovchilik guvohnomasini olgan.
Rasmiy ma’lumotlarda uning haydovchilik hujjatlarida Filadelfiya shahrining Somerton hududida yashagani qayd etilgan.
