Cloudflare tizimidagi uzilish sabab Facebook, X Va ChatGPT ishdan chiqdi
Global internet trafikining 20% ini boshqaruvchi Cloudflare kompaniyasidagi texnik nosozlik dunyo bo‘ylab yirik platformalar faoliyatini to‘xtatib qo‘ydi.
Bugun dunyo bo‘ylab internet foydalanuvchilari bir qator yirik platformalarga kirishda jiddiy muammolarga duch kelishdi. Uzilishlarning asosiy sababchisi sifatida Cloudflare kompaniyasidagi texnik nosozlik ko‘rsatilmoqda. Ma'lumotlarga ko'ra, ChatGPT, Facebook, X (sobiq Twitter), Spotify, Yandex Music kabi musiqa striming xizmatlari va hatto Amazon veb-resurslari faoliyatida uzilishlar kuzatilgan. Cloudflare internet xavfsizligi va infrastrukturasini ta’minlovchi hamda global veb-trafikning taxminan 20 foizini boshqaradigan yirik hosting provayderlardan biri hisoblanadi.
Foydalanuvchilarning ko‘plab shikoyatlaridan so‘ng, Cloudflare kompaniyasi yuzaga kelgan ushbu global uzilishdan xabardor ekanligini rasman tasdiqladi. Kompaniya ma’lum qilishicha, ular muammoni bartaraf etish uchun zarur choralarni ko‘rishmoqda va texnik nosozliklarni hal qilish ustida qizg‘in ish olib borilmoqda. Qayd etilishicha, ushbu uzilishdan biroz oldin Cloudflare Santyagodagi ma’lumotlar markazida rejali texnik ishlar amalga oshirilishi haqida ogohlantirish bergan edi, ammo bu ishlar global muammoga qanchalik sabab bo‘lgani hozircha aniq emas.
Mazkur holat yirik internet infratuzilmasi provayderlarining barqarorligi butun dunyo bo‘ylab onlayn xizmatlarning uzluksiz ishlashi uchun qanchalik muhim ekanligini yana bir bor ko‘rsatib berdi. Hozirda foydalanuvchilar ushbu yirik platformalarning tezroq normal holatga qaytishini kutishmoqda. Cloudflare jamoasi esa muammoning ildizini topish va uni to‘liq bartaraf etish uchun barcha choralarni ko‘rmoqda.
