O‘zbekiston kuz-qish mavsumida 10 million tonna ko‘mir qazib olishga tayyorlanmoqda
Energiya ta’minotini barqarorlashtirish uchun qo‘shimcha ishlab chiqaruvchilarga imkoniyatlar yaratiladi.
Davlat rahbari Shavkat Mirziyoyev ko‘mir qazib chiqarish bo‘yicha erishilgan ko‘rsatkichlar va yangi rejalar taqdimoti bilan tanishdi. Mamlakatda kuz-qish mavsumida aholi va iqtisodiyot tarmoqlarini energiya resurslari bilan uzluksiz ta’minlash ustuvor vazifa etib belgilangani, shu maqsadda ko‘mir sanoatida yangi loyihalar ishga tushirilayotgani ma’lum qilindi. O‘tgan mavsumda 8,7 million tonna ko‘mir qazib olinib, aholiga, byudjet tashkilotlari hamda issiqlik elektr stansiyalariga yetkazib berilgan.
Yangi mavsumda esa ko‘mir ishlab chiqarish hajmini 10 million tonnaga yetkazish ko‘zda tutilgan. Bu borada “O‘zbekko‘mir” AJ korxonalari modernizatsiya qilinmoqda, qo‘shimcha ishlab chiqaruvchilar uchun imkoniyatlar yaratilmoqda. Prezident aholiga ko‘mir yetkazib berishni kafolatlash bo‘yicha aniq topshiriqlar berdi, raqobatni kuchaytirish va mahsulot tannarxini pasaytirish muhimligi ta’kidlandi.
Shuningdek, taqdimot davomida uran bo‘yicha yangi investitsiya loyihalarini tezlashtirish, geologiya-qidiruv ishlari ko‘lamini kengaytirish masalalari ham ko‘rib chiqildi. Davlat rahbari bundan avval suyultirilgan gaz yetkazib berishdagi uzilishlarni keskin tanqid qilib, masalaga zudlik bilan yechim topish kerakligini qayd etgan edi — aynan energiya xavfsizligini ta’minlash bu mavsumda eng ustuvor vazifalardan biri bo‘lib qolmoqda.
