Prezident Shavkat Mirziyoyev Masato Kando boshchiligidagi OTB delegatsiyasini qabul qildi
2026-yil may oyida Samarqandda Osiyo taraqqiyot bankining yillik yig‘ilishi o‘tkaziladi.
O‘zbekiston Respublikasi Prezidenti Shavkat Mirziyoyev 18-noyabr kuni Osiyo taraqqiyot banki (OTB) prezidenti Masato Kando boshchiligidagi delegatsiyani qabul qildi.
Uchrashuv avvalida OTB rahbari davlatimiz rahbarini O‘zbekiston va bank o‘rtasidagi strategik sheriklikning 30 yilligi, shuningdek, 2025–2026-yillarda Boshqaruvchilar kengashiga raislik mamlakatimizga o‘tgani bilan tabrikladi.
Muzokaralarda mamlakatimizda amalga oshirilayotgan ijtimoiy-iqtisodiy islohotlar doirasida o‘zaro hamkorlikni yanada kengaytirish masalalari ko‘rib chiqildi. Bugungi kunda O‘zbekiston bankning mintaqadagi eng yirik hamkorlaridan biri bo‘lib qolmoqda — amaldagi qo‘shma loyihalar portfeli 15 milliard dollardan oshgan. Shuningdek, “yashil” energetika, transport, raqamli transformatsiya, ta’lim va boshqa yo‘nalishlarda jami 3 milliard dollardan ortiq yangi loyihalar ishlab chiqilmoqda. Suveren bo‘lmagan moliyalashtirish mexanizmlarini joriy etish ishlari faollashgan.
Shu bilan birga, 2026-yil may oyida Samarqand shahrida o‘tkaziladigan OTB Boshqaruvchilar kengashining yillik yig‘ilishiga tayyorgarlik masalalariga alohida e’tibor qaratildi.
Prezident Shavkat Mirziyoyev yig‘ilish doirasida OTB bilan Kengaytirilgan strategik sheriklik dasturini imzolash tashabbusini ilgari surdi. Unda infratuzilmani modernizatsiya qilish, texnik va muhandislik mutaxassislarini tayyorlash, xotin-qizlar va yoshlarni zamonaviy kasblarga o‘qitish, kambag‘allikni qisqartirish, ipoteka bozori va xususiy sektorni rivojlantirish kabi yo‘nalishlar ustuvor vazifa sifatida belgilanishi ta’kidlandi.
Uchrashuvda bankning mintaqaviy tashabbuslarni qo‘llab-quvvatlashdagi faolligi, jumladan, Markaziy Osiyo bo‘yicha transport, energetika va savdo loyihalarini ilgari surish muhim ekani qayd etildi.
OTB prezidenti Masato Kando O‘zbekistonda amalga oshirilayotgan keng ko‘lamli islohotlarni yuqori baholab, ularni ro‘yobga chiqarishda bank tomonidan har tomonlama ko‘mak berishga tayyor ekanini bildirdi.
