Shavkat Mirziyoyev tashqi mehnat migratsiyasi tizimini takomillashtirish bo‘yicha taqdimot bilan tanishdi
Xizmatlarni "yagona darcha" asosida birlashtirish, malaka oshirish markazlarini ochish va Yevropa bilan hamkorlikni kuchaytirish asosiy vazifalardan etib belgilandi.
Prezident Shavkat Mirziyoyev 18-noyabr kuni tashqi mehnat migratsiyasi tizimini tubdan takomillashtirishga qaratilgan masalalarni ko‘rib chiqdi. Ma’lumotlarga ko‘ra, so‘nggi yillarda migratsiya tizimidagi islohotlar samara berib, garchi xorijda ishlayotgan fuqarolar soni kamaygan bo‘lsa-da, ularning O‘zbekistonga yuborgan pul o‘tkazmalari 2016-yilga nisbatan qariyb 4 barobar oshib, 2025-yilning o‘n oyi yakunida 15,8 milliard dollarga yetgan. Biroq, xorijiy mehnat bozorida talab yuqori bo‘lgan 140 mingdan ortiq bo‘sh ish o‘rinlariga munosib til va kasbiy malakaga ega mutaxassislarni tayyorlashda hali ishlar ko‘pligi qayd etildi. Shuningdek, xizmatlarning tarqoqligi sababli fuqarolar ovoragarchilikka duch kelayotgani ta'kidlandi.
Ushbu muammolarni hal etish maqsadida, barcha migratsiya xizmatlarini "yagona darcha" tamoyili asosida birlashtirish vazifasi qo‘yildi. Amaliy qadam sifatida, Toshkentning Uchtepa tumanida “Xorijga ishga tayyorlash markazi”, Termiz shahrida esa “Yagona migratsiya xizmatlari” markazi tashkil etiladi. Yevropa mamlakatlariga migratsiya oqimi 4 barobar ko‘payganini inobatga olib, Germaniya va Yaponiya kabi davlatlar bilan hamkorlikda til o‘qitish maktablari ochish rejalashtirilmoqda. Shu bilan birga, fuqarolarning huquqiy himoyasini kuchaytirish uchun Yevropa davlatlari bilan hukumatlararo kelishuvlarni imzolashni jadallashtirish bo‘yicha topshiriq berildi.
Taqdimotda migratsiya xizmatlarini raqamlashtirishni chuqurlashtirishga alohida e’tibor qaratildi. Hozirda “Xorijda ish” platformasi orqali 25 turdagi xizmatlar ko‘rsatilib, 2025-yil boshidan 524 ming fuqaro onlayn xizmatlardan foydalangan. Prezident sun’iy intellekt (AI) texnologiyalarini joriy etish, biometrik identifikatsiya, xorijdagi ish o‘rinlarini real vaqt rejimida kuzatishni yo‘lga qo‘yish zarurligini ta’kidladi. Shuningdek, noqonuniy migratsiya va firibgarlik holatlariga qarshi kurashish maqsadida litsenziyasiz konsalting tashkilotlari uchun jarimalarni oshirish va Jinoyat kodeksiga yangi javobgarlik kiritish masalasi o‘rganiladigan bo‘ldi. Davlat rahbari taqdim etilgan barcha takliflarni ma’qullab, migratsiya jarayonlarini yanada qulay, xavfsiz va shaffof qilish bo‘yicha qo‘shimcha ko‘rsatmalar berdi.
