Yevropa Ittifoqi o‘zbekistonlik tadbirkor Rustam Mo‘minovni sanksiyalar ro‘yxatiga qo‘shdi
Uning Rossiya harbiy-sanoat kompleksini qo‘llab-quvvatlashi cheklovga sabab bo'lgan.
Ittifoq o‘zbekistonlik tadbirkorni urush olib borayotgan Rossiya porox zavodiga paxta sellyulozasi yetkazib berishda aloqador deb hisoblab, 19-sanksiyalar paketiga qo‘shdi. Yevropa Ittifoqi hujjatlarida keltirilishicha, Rustam Mo‘minov O‘zbekiston, Rossiya va Buyuk Britaniya kabi davlatlarning fuqaroligini olgan.
YEI hujjatida qayd etilishicha, 1965-yilda tug‘ilgan Mo‘minovning cheklovlarga uchrashi Rossiya harbiy-sanoat kompleksini qo‘llab-quvvatlashi bilan bog‘liq.
Bryusselning baholashicha, Rustam Mo‘minov Farg‘onadagi Farg‘ona Kimyo Zavodi paxta sellyulozasi zavodini nazorat qiladi. Uning mahsulotlari Perm va Qozon porox zavodlariga yetkazib berilishi aytilmoqda. Bu materiallar Rossiya qurolli kuchlari uchun qurol ishlab chiqarishda ishlatilgan bo‘lishi mumkin.
Gazeta.uz’ning yozishicha, Farg‘ona kimyo zavodi va Raw Materials Cellulose “Vajniye istorii”, Vlast.Kz nashrlari va OCCRP konsernining qo‘shma tekshiruvida, shuningdek, BBC rus xizmatining tekshiruvida ishtirok etgan. Materiallarda aytilishicha, bu ikki korxona Rossiya porox zavodlariga paxta sellyulozasini ham to‘g‘ridan-to‘g‘ri, ham xususiy vositachilar orqali yetkazib beradi. Jurnalistlarning hisob-kitoblariga ko‘ra, 2022-yilda Rossiyaning Ukrainaga keng ko‘lamli bosqini boshlanganidan beri ushbu yetkazib berish hajmi bir necha barobar oshgan.
Mazkur holat yuzasidan Zamon.uz Farg‘ona sellyuloza ishlab chiqartish kimyo zavodi saytida ko‘rsatilgan raqam bilan bog‘landi. O‘zining ismini aytishni xohlamagan shaxs mazkur xabarlarga munosabat bermasligini aytdi.
O‘zbekiston qonunchiligiga ko‘ra, O‘zbekistonda bir nechta fuqarolik qabul qilinmaydi. O‘zbekiston Konstitutsiyasining 21-moddasida ham O‘zbekistonda yagona fuqarolik tan olishi ko‘rsatib o‘tilgan.
Ichki ishlar vaziri matbuot kotibi Shohrux G‘iyosovning zamon.uz’ga fuqarolikdan chiqarish faqat prezident qarori bilan amalga oshirilishini ma’lum qildi. Uning aytishicha, prezident qarori chiqmagunicha fuqaro O‘zbekiston fuqaroligidan mahrum qilinmaydi.
Eslatib o'tamiz, avvalroq Ukraina ham Farg'ona kimyo zavodiga sanksiyalar qo'llagan edi.
