Toshkentda narkotik savdosi bilan shug‘ullangan ona-bola qo‘lga olindi
Tezkor tadbir davomida 8 kg dan ortiq giyohvandlik moddalari musodara qilindi.
Toshkent shahrida DXXning shahar boshqarmasi, IIBB va Bojxona xizmati hamkorligida o‘tkazilgan maxsus operatsiya davomida narkotik moddalarning kontrabandasi bilan shug‘ullangan oila a’zolari qo‘lga olindi. Ular giyohvandlik vositalarini Tojikistondan yashirin yo‘llar bilan olib kirib, poytaxtda sotishga harakat qilgani aniqlangan. Bu haqda Zamon.uz'ga DXX xabar qildi.
Operatsiya jarayonida “Ohangaron–Piskent” yo‘nalishida harakatlanayotgan, oldindan nazoratga olingan “EQUINOX” rusumli avtomobil to‘xtatilib tekshirildi. Mashinada bo‘lgan 1976-yilda tug‘ilgan ayol va uning 1999-yilda tug‘ilgan o‘g‘li kontrabanda yo‘li bilan kirib kelgan narkotik moddani olish uchun yo‘lga chiqqanliklari ma’lum bo‘ldi. Ularning telefonlarini ko‘zdan kechirish chog‘ida tojikistonlik shaxs tomonidan “Telegram” orqali giyohvandlik moddasining joylashuvi va fotosuratlari yuborilgani aniqlandi. Shundan so‘ng tezkor guruh Piskent tumanidagi yo‘l chetiga yashirilgan 4,9 kg “gashish”ni dalil sifatida topib oldi.
Shuningdek, gumondorlarning Olmazor tumanidagi uyida o‘tkazilgan tintuv chog‘ida qo‘shimcha ravishda 1,1 kg “opiy” va 1,9 kg “gashish” moddasi ham topildi. Ayolning avval sudlangan, 1996-yilda tug‘ilgan yana bir o‘g‘li ham ushbu jinoyatga aloqadorlikda gumonlanib qo‘lga olindi.
Hozirda ular ustidan Jinoyat kodeksining tegishli moddalari bo‘yicha ish qo‘zg‘atilib, “qamoq” ehtiyot chorasi qo‘llangan. Tezkor-tergov harakatlari davom etmoqda.
