Buxoroda 35 ming dollar evaziga 343 gramm simob sotmoqchi bo‘lgan shaxslar qo‘lga olindi
Hozirda tergov harakatlari olib borilmoqda.
Davlat xavfsizlik xizmati Buxoro viloyati bo‘yicha boshqarmasi xodimlari tomonidan, Iqtisodiy jinoyatlarga qarshi kurashish departamenti hamda Milliy gvardiyaning hududiy bo‘linmalari bilan hamkorlikda o‘tkazilgan tezkor tadbir davomida ikki nafar shaxs qo‘lga olindi.
Buxoro shahrida yashovchi 1998-yilda tug‘ilgan shaxs hamda Buxoro tumanida istiqomat qiluvchi 1984-yilda tug‘ilgan fuqaro o‘zaro til biriktirib, mamlakat hududida erkin muomalasi taqiqlangan jami 343 gramm simobni (3 dona flakonda) 35 ming AQSh dollariga sotmoqchi bo‘lgan vaqtida ushlandi. Holat bo‘yicha moddiy dalillar tegishli tartibda rasmiylashtirildi.
Mazkur holat yuzasidan ularga nisbatan O‘zbekiston Respublikasi Jinoyat kodeksining 185-1-moddasi 2-qismi “b” va “v” bandlari bilan jinoyat ishi qo‘zg‘atilib, tergov harakatlari olib borilmoqda.
