Germaniya kosmik mudofaa salohiyatini oshirish uchun 35 mlrd yevro ajratadi
Berlinning yangi kosmik strategiyasi 2030-yilgacha Germaniyani AQSh va Xitoydan keyingi uchinchi yirik kosmik mudofaa tizimi kuchli davlatga aylantiradi.
Germaniya hukumati o‘zining ilk milliy kosmik strategiyasini tasdiqladi. OAV xabariga ko‘ra, ushbu hujjat doirasida Berlin 2030-yilgacha 35 milliard yevro miqdorida mablag‘ni kosmik mudofaa imkoniyatlarini rivojlantirishga yo‘naltiradi. Strategiya asosan Rossiya va Xitoyning kosmosdagi harbiy faolligiga qarshi turish, shuningdek, Yevropa xavfsizligini mustahkamlashni ko‘zlaydi.
Rejaga binoan:
— Germaniya radioelektron kuzatuv tizimlari, harbiy maqsadlardagi sun’iy yo‘ldoshlar, xavfsiz aloqa hamda razvedka texnologiyalarini kengaytiradi.
— Harbiy sun’iy yo‘ldoshlarning barqarorligini oshirish, ularga qarshi amalga oshirilishi mumkin bo‘lgan hujumlardan himoyalash bo‘yicha yangi platformalar yaratiladi.
— Berlin NATOning kosmik xavfsizlik tashabbuslarida faolroq ishtirok etishni rejalashtirgan.
Yangi strategiya Yevropadagi umumiy himoya tizimining muhim bo‘lagi sifatida qaralmoqda. So‘nggi yillarda kosmos harbiy raqobatning asosiy maydonlaridan biriga aylangan bo‘lib, AQSh, Xitoy va Rossiya o‘z kosmik qo‘shinlarini keng rivojlantirmoqda. Germaniya esa, bunga javoban, o‘z kosmik qo‘mondonligini mustahkamlash va Yevropa Ittifoqi doirasida texnologik yetakchilikni oshirishni maqsad qilmoqda.
