Namanganda ta’lim tizimidagi mansabdorlar tomonidan tashkil qilingan “bunker” fosh etildi
Attestatsiya imtihonlarida noqonuniy yordam ko‘rsatgan mansabdorlar va o‘qituvchilar qo‘lga olindi.
Namangan shahrida ta’lim tizimida faoliyat yurituvchi bir guruh mansabdor shaxslar tomonidan tashkil etilgan noqonuniy “bunker” fosh etildi. DXX va Iqtisodiy jinoyatlarga qarshi kurashish departamenti tomonidan o‘tkazilgan tezkor tadbir davomida mazkur xonadonda attestatsiya imtihonlari uchun test savollarini masofadan turib yechishga jalb qilingan 12 nafar o‘qituvchi aniqlangan.
Tekshiruv jarayonida bir nechta noutbuklar, 30 dona turli eshitish moslamalari, yashirin kameralar, 8 ta Wi-Fi router va boshqa texnik vositalar ashyoviy dalil sifatida olindi.
Ma’lum bo‘lishicha, Davlatobod tumanidagi umumiy o‘rta ta’lim maktabi direktori o‘rinbosari, Namangan davlat texnika universiteti bo‘lim boshlig‘i va bo‘lim mutaxassisi pedagoglarga moddiy manfaat evaziga test savollarini “bunker” orqali yechishda yordam berib kelgan. Ular ayrim o‘qituvchilardan attestatsiya natijalarini ijobiy hal qilib berish uchun 1300–1500 dollar talab qilgan bo‘lib, faqatgina sentyabr–oktyabr oylarida 25 ming dollar miqdorida pul yig‘ib olganliklari aniqlangan.
Hozirda mazkur shaxslarga nisbatan Jinoyat kodeksining 168-moddasi 3-qismi “b” bandi va 28,211-moddasi 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda. Aniqlanishicha, maktab direktori o‘rinbosari va “bunker”ni boshqargan shaxs avval ham xuddi shunday jinoyat uchun javobgarlikka tortilgan.
