Nogironligi bo‘lgan shaxslar kambag‘allik reyestridan chiqariladi— Prezident

 

Prezident Shavkat Mirziyoyev raisligida kambag‘allikni qisqartirish va aholi bandligini oshirish masalalariga bag‘ishlangan yig‘ilish bo‘lib o‘tdi. Unda ehtiyojmand aholining ijtimoiy himoyasi bo‘yicha yangi tartib va ustuvor vazifalar belgilab olindi.

 

Davlat rahbari yig‘ilishda, endilikda daromad topish imkoniyati cheklangan va nogironligi bor shaxslar kambag‘allar reyestrida yuritilmasligi, ularni qo‘llab-quvvatlash to‘liq davlat zimmasiga olinishini ta’kidladi.

 

2026-yildan “Teng imkon – inklyuziv bandlik” loyihasi amaliyotga joriy qilinadi. Ushbu tashabbus doirasida nogironligi bo‘lgan 40 ming nafar fuqaroning bandligini ta’minlash rejalashtirilgan. Shu maqsadda Bandlik jamg‘armasi tomonidan ularga 30 million so‘mgacha foizsiz ssuda ajratish tizimi yo‘lga qo‘yiladi.

 

Yig‘ilishda, shuningdek, kambag‘allikka qayta tushish xavfi bo‘lgan oilalar uchun mavjud ijtimoiy yordam va imtiyozlar saqlab qolinishi qayd etildi. Ular 6 oy davomida moddiy yordam va bolalar nafaqasini olishda davom etadi. Shuningdek, bog‘cha va to‘garak xarajatlarini qoplash, davolanish orderi kabi 110 ta turdagi ijtimoiy xizmat va yordamdan 12 oy mobaynida qo‘shimcha foydalanish imkoniyati yaratiladi.

 

Bundan tashqari, og‘ir hayotiy vaziyat tufayli kambag‘allik xavfi yuqori bo‘lgan oilalarni oldindan aniqlash va ularga manzilli yordam ko‘rsatish tizimi kuchaytiriladi.

 

Ushbu vazifalar ijrosi ustidan nazorat, shuningdek, viloyat hokimliklari bilan hamkorlikda ularni amaliyotga joriy etish mas’uliyati Ijtimoiy himoya milliy agentligi direktori birinchi o‘rinbosari Shahnoza Mirziyoyeva zimmasiga yuklatildi.