Yaponiyada 170 dan ortiq uy-joy yonib ketdi, bir kishi halok bo‘ldi
Bir uyda boshlangan yong‘in kuchli shamol sabab qo‘shni binolarga tarqalgan.
Yaponiyaning Oita shahrida sodir bo‘lgan yirik yong‘in oqibatida 170 dan ortiq bino, jumladan ko‘plab turar-joylar butunlay yonib ketdi. Bu haqda NHK axborot agentligi xabar berdi deydi RBK nashri.
Dastlabki ma’lumotlarga ko‘ra, Saganoseki tumanida 18-noyabr kuni kechqurun bir uyda boshlangan yong‘in kuchli shamol sabab tezda qo‘shni binolarga tarqalgan. Yong‘in jami 48,9 ming kvadrat metr maydonni qamrab olgan.
Voqea joyidan bir kishining jasadi topilgan. Dastlabki xulosalarga ko‘ra, marhumning yurak xuruji oqibatida vafot etgan bo‘lishi mumkin. Uning shaxsi aniqlanmoqda. Shuningdek, 50 yoshli ayol tutun bilan zaharlanish va yengil kuyishlar tufayli shifoxonaga yotqizilgan.
Favqulodda holat sabab 167 kishi evakuatsiya qilingan, ular vaqtincha mahalliy jamoat markaziga joylashtirilgan. Taxminan 350 ta uy elektr ta’minotisiz qolgan.
Tokioga xizmat safaridan qaytgan prefektura gubernatori Oita Sato jabrlanganlarga barcha zarur yordam ko‘rsatishini ma’lum qildi. Prefektura hokimiyati, shahar ma’muriyati va tegishli tashkilotlar bilan hamkorlikda vaqtinchalik uy-joy ajratish va qo‘shimcha talafotlarning oldini olish choralarini ko‘rmoqda.
Saganoseki hududi ko‘p hollarda yog‘ochdan qurilgan kam qavatli uylar bilan zich joylashgani tufayli yong‘in qisqa fursatda katta hududga tarqalgan.
