“O‘zgidromet”: Toshkentdagi havo sifati 24-noyabrdan boshlab yaxshilanishi kutilmoqda
“O‘zgidromet” rahbari havo sifatining yomonlashishi sabablari va vaziyat qachon barqarorlashishini ma’lum qildi.
O‘zgidromet direktori Sherzod Habibullaev Toshkentda hamda bir qator boshqa shaharlarda kuzatilayotgan havo sifatining keskin pasayishiga oid omillar yuzasidan izoh berdi. Uning so‘zlariga ko‘ra, bir nechta tabiiy jarayonlarning bir vaqtda sodir bo‘lishi muammo chuqurlashishiga olib kelgan. Vaziyat 24-noyabrdan keyin bosqichma-bosqich yaxshilanib borishi kutilmoqda.
Habibullaevning ma’lumotiga ko‘ra, havo sifatiga eng katta ta’sir ko‘rsatgan omil — harorat inversiyasi. Sovuq havo yerga cho‘kib, iliq havo yuqori qatlamda qolib ketgani tufayli havo qatlamlari aralashmay qoladi. Bu sharoitda inson salomatligi uchun xavfli bo‘lgan PM10 zarrachalari past qatlamda to‘planib, havoning ifloslanish darajasini oshiradi. Shunga o‘xshash holat har yili noyabrdan fevralgacha Olmaota, Bishkek va Dushanbe kabi shaharlarda ham kuzatiladi.
Ikkinchi omil — yog‘ingarchilikning kamligi. Noyabr oyida Toshkentda deyarli yomg‘ir yog‘magani sababli havo tabiiy ravishda tozalanmayapti. Bu esa chang va kuyik zarralarining atmosferada uzoq vaqt qolib ketishiga olib kelmoqda.
Uchinchi omil — qurg‘oqchilik va tabiiy changning ortishi. O‘zbekiston quruq iqlim zonasida joylashgani, vegetatsiya pasayishi, global isish ta’siri va shamol jarayonlarining kuchayishi fonida chang darajasi yil sayin oshib bormoqda. Bu yil esa hatto shamolsiz kunlarda ham PM10 ko‘rsatkichlari me’yordan yuqori bo‘lib qolmoqda.
Habibullaevning ta’kidlashicha, holat mavsumiy xarakterga ega va vaqtinchalik. Vakolatli idoralar vaziyatni uzluksiz monitoring qilib bormoqda hamda zarurat tug‘ilganda qo‘shimcha choralar ko‘rishga tayyor.
