Elchi Serjio Gor AQSH–O‘zbekiston ishbilarmonlik va investitsiya kengashiga rahbarlik qiladi
Yangi kengash ikki davlat iqtisodiy hamkorligini yangi bosqichga olib chiqishi aytilmoqda.
Amerika Qo‘shma Shtatlarining Janubiy va Markaziy Osiyo bo‘yicha maxsus vakili, Elchi Serjio Gor AQSH–O‘zbekiston Ishbilarmonlik va Investitsiya Kengashiga hamrais etib tayinlandi. Bu kengash “Amerika birinchi” tamoyiliga asoslangan iqtisodiy tashabbuslarni Markaziy Osiyoda kuchaytirish hamda amerikalik ishchilar va bizneslar uchun yangi imkoniyatlar yaratishga qaratilgan. Bu haqda AQSH elchixonasi xabar berdi.
Elchi Gor kengashdagi AQSH tomonini O‘zbekiston Prezidenti Administratsiyasi rahbari Saida Mirziyoyeva bilan hamkorlikda boshqaradi. Tashabbus Prezident Trampning AQSHning global iqtisodiy yetakchiligini mustahkamlash va Amerika kompaniyalari uchun chet el bozorlarida yanada keng imkoniyatlar yaratishga qaratilgan siyosatini aks ettiradi.
Kengash investitsiya va eksport salohiyatini oshirish, ayniqsa IT va raqamli innovatsiyalar kabi jadal rivojlanayotgan sohalarda hamkorlikni kuchaytirishni maqsad qiladi. Prezident Shavkat Mirziyoyevning noyabr oyidagi Vashington safari davomida “C5+1” sammiti doirasida ko‘rsatilgan kuchli dinamika ushbu kengash faoliyati bilan yanada mustahkamlanib, ikki davlat o‘rtasidagi strategik iqtisodiy aloqalarning rivojlanishiga xizmat qiladi.
