IIV tizimida tozalash ketmoqda: salkam 500 nafar xodim ishdan bo‘shatildi
557 nafar rahbar va xodimga noo‘rin harakatlari uchun intizomiy jazolar qo‘llanilgan.
Joriy yilda IIV SHXBB tomonidan 60 ga yaqin nopok xodimga tezkor tadbir o‘tkazilib, jazolandi. Bu haqida vazirlik matbuot xizmati xabar bermoqda.
Qayd etilishicha, 557 nafar rahbar va xodimga noo‘rin harakatlari uchun intizomiy jazolar qo‘llanilgan. 479 nafar xodim tizimdan bo‘shatilgan.
Xususan, Toshkent viloyati IIBB Karantin tadbirlarini taʼminlash guruhi xodimi fuqaroni kelgusida isteʼmolga yaroqsiz go‘sht maxsulotlarini olib o‘tishiga ko‘z yumish evaziga 500 AQSH dollarini olgan vaqtida ushlangan.
Holat yuzasidan JKning 210-moddasi 2-qismi «v» bandi bilan jinoyat ishi qo‘zg‘atib, xodimga nisbatan “qamoqqa olish” extiyot chorasi qo‘llanilgan.
Navbatdagi holat Samarqanda yuz bergan. Unda Pastdarg‘om tuman IIB profilaktika inspektori ish yurituvidagi hujjatlar bo‘yicha fuqaroga chora ko‘rmaslik evaziga undan 800 AQSH dollarini olgan vaqtida ushlangan.
Holat yuzasidan JKning 168-moddasi 3-qismi “a” bandi va 211-moddasi 1-qismi bilan jinoyat ishi qo‘zg‘atilib, xodimga nisbatan “qamoqqa olish” extiyot chorasi qo‘llanilgan.
Yana bir xolatda. Namangan viloyati Davlatobod tumani IIB patrul-post xizmati xodimi fuqaroni avtomashinasidan giyohvandlik moddasini aniqlab chora ko‘rmaslik evaziga undan umumiy qiymati 11 million sumlik tilla taqinchoqlarni tamagirlik yo‘li bilan olgan vaqtida ushlangan.
Xodim IIOdan bo‘shatilgan va to‘plangan hujjatlar prokuraturaga yuborilgan.
