“Ko‘p gapirmasdan amaliy jasorat ko‘rsating” — Shohrux Shodmonov havo ifloslanayotganiga munosabat bildirdi
U masʼullarni hisobot va izohlar bilan cheklanmasdan, real harakatlar boshlashga chaqirmoqda.
Toshkent shahri Chilonzor tumani kengashi deputati, xonanda Shohrux Shodmonov masʼullarni havo ifloslanishiga qarshi real harakatlar boshlashga chaqirdi. Bu haqida u o‘zining Instagram sahifasida post yozib qoldirdi.
“Bu mavsumiylik yoki tabiiy jarayonlar emas, bu — befarqlik natijasidir. Bolalarimiz zaharli havodan nafas olmoqda. Odamlar niqob va tozalagichlar bilan o‘z sog‘lig‘ini himoya qilishga urinmoqda. Biroq, hammaning ham bunday narsalarni sotib olishga imkoni yo‘q. Aholi qo‘lidan kelganini qilmoqda, lekin masʼul tuzilmalar hanuz faqat hisobot va izohlar bilan cheklanmoqda”, — deya qayd etdi deputat.
Uning taʼkidlashicha, ekologiya masʼullari bu masalani tez, qatʼiy va keskin tarzda hal qilishi kerak.
«Sizlarning sustkashligingizdan millionlab tirik odamlar aziyat chekyapti. Shu kunlarda sizlarga kengaytirilgan vakolatlar va real vositalar berildi. Bu sizlar uchun qahramonlarga aylanish imkoniyati!
“Agar shundan keyin ham hech nima qila olmasangiz, unda bilmadim sizlarni nima deb atashni. Shuning uchun ko‘p gapirmasdan amaliy jasorat ko‘rsating!” — deb postini yakunlagan Shohrux Shodmonov.
