Navoiyda 3 yoshli qizning qo‘li go‘sht maydalagichga kirib ketdi
Qizcha ovqat uchun go‘sht tayyorlayotgan onasining yonida turgan va kutilmaganda qo‘lini maydalagichning yuqori qismidagi bo‘shliqdan tushirib yuborgan.
Navoiy viloyatining Zarafshon shahridagi xonadonlardan birida 3 yoshli qizaloqning qo‘li go‘sht maydalagichga kirib ketdi. Bu haqida o‘z manbalariga tayanib, Kun.uz nashri xabar bermoqda.
Qayd etilishicha, qizcha ovqat uchun go‘sht tayyorlayotgan onasining yonida turgan va kutilmaganda qo‘lini maydalagichning yuqori qismidagi bo‘shliqdan tushirib yuborgan. Ona darhol qurilmani to‘xtatgan, ammo barmoqlar metall konstruksiya ichida siqilib qolgan. Jihoz metalldan ishlangani hisobiga uni sindirish imkoni bo‘lmagan.
Shundan so‘ng, ayol shahar tez tibbiy yordam bo‘limiga murojaat qilgan. Tez tibbiy yordam xodimlari 12 daqiqa ichida voqea joyiga yetib borgan. Bolani harakatlantirish jarayonida jarohat yana-da chuqurlashib ketmasligi uchun 3 nafar tibbiyot xodimi qizaloqni go‘sht qiymalagich bilan birga shifoxonaga ko‘tarib kelishgan.
Zarafshon shahar tibbiyot birlashmasi travmatolog-shifokori Elmurod Ahatovning maʼlum qilishicha, bola shifoxonaga olib kelinganda hushi bor, ammo og‘riq shoki ostida edi. Chap qo‘lida ko‘p miqdorda qon ketishi, yumshoq to‘qimaning chuqur shikastlanishlari kuzatilgan. Jarohat asosan chap qo‘l barmoqlari va kaft qismida yuzaga kelgan.
“Operatsiya 2 soatdan ortiq davom etdi. Jarayon juda murakkab bo‘ldi, barmoq paylari, nerv tolalari, mushaklarning bir qismi jarohatlangandi. Operatsiyada mikrojarrohlik tikuvlari, maxsus optik uskunalar, qon tomirlarini tiklash uchun nozik jarrohlik iplaridan foydalanildi. Eng qiyin qism barmoqlardagi qon tomirlarni tiklash bo‘ldi. Chunki bunday yoshdagi bolalarda tomirlar juda nozik, ularni tiklash uchun katta tajriba va aniqlik talab etiladi”, – deydi Elmurod Ahatov.
Shifokorning aytishicha, dastavval qo‘lni saqlab qolish imkoniyati 50 foizdan past baholangan. Jarohat chuqur bo‘lgani, yirik nerv tolalari va qon tomirlari shikastlangani sababli nekroz, funksiyani yo‘qotish xavfi yuqori bo‘lgan.
Hozirda qizaloqning ahvoli barqaror, u jarrohlikdan keyingi kuzatuv palatasida. Tiklanish jarayoni kamida 2–3 oy, to‘liq motor funksiyalarini tiklash esa 6 oygacha davom etishi mumkin.
